Að mörgu er að hyggja þegar menn rannsaka norræn trúarbrögð til forna og heimildir eru af ýmsu tagi. Hvaðan kemur okkur vitneskja um trú forðfeðranna?

Ritaðar heimildir eru af margvíslegum toga.

Dróttkvæði voru ort á tímabilinu 850 – 1350. Þau eru skotin kenningum og heitum, sem mörg eiga rætur að rekja til fornra trúarbragða. Varðveisla þeirra er með ýmsu móti, en almennt telja menn kenningar þeirra reistar á goðsögnum, sem hafa verið til. Margar þeirra eru týndar, og þá verður kenningin illskiljanleg nútímamönnum. Sum dróttkvæði fjalla sérstaklega um goðsagnir. Mestu máli skipta auðvitað þau kvæði, sem menn telja ort á heiðnum tíma.