Egla
Verkefni 1. – 27. kafla

• Mannlýsingar. – Þegar persónur eru kynntar til sögunnar þarf að athuga einkenni þeirra: útlit, skapgerð, ætterni, hæfileika, galla, kosti, þjóðfélagsstöðu.
• Skrifið hjá ykkur það sem ykkur finnst vel sagt í sögunni, fleyg orð. Flettið upp í orðskýringum að orðum sem þið skiljið ekki. Skoðið kort í skýringunum aftan við söguna til að fá sýn yfir sögusviðið.
• Skráið allar forspár og fylgist með hvernig þær rætast.

Svör – Ekki skoða þau fyrr en þið hafið reynt við spurningarnar sjálf.

1. Hvar og hvenær hefst sagan? Hvað er að gerast í Noregi á þessum tíma varðandi konungsvaldið?

2. Athugið ættirnar tvær er að Þórólfi og Skalla-Grími Kveld-Úlfssonum standa. Hver eru helstu einkenni ættanna og hvernig birtast þau í þeim bræðrum?

3. Hver eru viðhorf Kveld-Úlfs og sona hans til hins nýja sterka konungsvalds? Hafa viðhorfin eitthvað með ættareinkennin að gera?

4. Hverjir eru vinir Þórólfs? Hvernig auka vináttubönd og mægðir á frama hans?

5. Rannsakið Hildiríðarsyni, ætt, uppruna og skapferli.

6. Rekið frama Þórólfs. Skýrið hvers vegna frami hans verður jafnmikill og raun ber vitni. Hvernig tekur Kveld-Úlfur frama sonar síns?

7. Skýrið vandlega af hverju Hildiríðarsynir rægja Þórólf. Rekið róginn lið fyrir lið. Hvað er sennilegt í honum og lævíslegast?

Oft er talað um sagnlist. Má ekki sjá hana í þessum köflum? Hver eru einkenni hennar hér?

8. Hugið vandlega að persónueinkennum Haralds hárfagra og Þórólfs Kveld-Úlfssonar. Að hvaða leyti eru þeir ólíkir? Hvað einkennir þá?

9. Hvað verður Þórólfi að falli? Minnist nú orða Kveld-Úlfs.

10. Rekið hvernig Kveld-Úlfur og Skalla-Grímur hefna Þórólfs.

11. Skoðið vandlega hjónabönd Sigríðar á Sandnesi. – Hverjir eru menn hennar og af hverju giftist hún þeim? Hvernig var stofnað til hjónabands á þessum tíma? – Finnið hliðstæður síðar í sögunni.

12. Teiknið mynd af Skalla-Grími og félögum á konungsfundi eftir fall Þórólfs.

© Íslenskudeild FÁ