Egla
Verkefni 27. – 49. kafla

• Hvað er fólgið í eftirfarandi hugtökum í sögunni: ást, festar, brullaup, lausabrullaup, mundur, bónorð, mansöngur, legorð, giftast, kvænast, heit, festaröl, brúðkaup, brúðhlaup?
• Skoðið vel kortið af landnámi Skalla-Gríms (bls. 291).

1. Kveld-Úlfur hefur alla forsögu um landnám í nýju landi þótt aldrei nái hann þangað sjálfur. Af hverju fer sérlega vel á því í sögunni?

2. Ástarsaga Björn hölds Brynjólfssonar og Þóru hlaðhandar Hróaldsdóttur leiðir margar persónur inn í söguna við ýmis tækifæri. Hverjir eru það og hvernig koma þeir við sögu?

3. Skýrið reiði Skalla-Gríms er hann kemst að hvernig allt er í pottinn búið hjá Birni og Þóru?

4. Hverjir eru ástfangnir í sögunni og hvernig brýst ástin fram?

5. Hvað einkennir búskap Skalla-Gríms? Hvar á hann bú? Skoðið vandlega persónueinkenni Skalla-Gríms, lýsið honum.

6. Æska Egils. Dragið upp mynd af Agli í æsku og hafið í huga samskipti hans við þessar söguhetjur: Beru mömmu Yngvarsdóttur, Skalla-Grím pabba, Yngvar móðurafa, Þórólf bróður, Ásgerði meyju Björnsdóttur, Brák fóstru, Grím leikfélaga Heggsson, Þórð leikbróður Granason og bústjóra Skalla-Gríms.

7. Þórólfur fer utan með Birni og Þóru. Hvað er langt um liðið frá átökunum í Noregi er leiddu til vinslita ættanna?

8. Rannsakið Gunnhildi. Skráið allar helstu kjaftasögur um hana, dragið ekki úr slúðrinu. Gætið vel að lokum 38. kafla er Þóra hlaðhönd deyr, Björn kvænist á ný og Ásgerður litla fær systur. Nú fer senn að reyna á lögmæti hjónabanda eins og í upphafi sögu. Arfsmál í vændum.

9. Þórólfur kemur út með gjafir úr konungsgarði til Skalla-Gríms! Hvernig bregst Skalla-Grímur við? Sagan af því er einhvers konar táknsaga. Hvernig má túlka hana?

10. „Fátt var með Agli og Þórólfi,“ segir í 41. kafla, „en Egill var fylgjusamur Arinbirni Þórissyni.“ – Skýrið þetta.

11. Atleyjarförin. Hver andskotinn gengur að Agli? Hví lætur drengurinn svo? Rekið gang mála og skoðið vandlega hvernig sættir nást og hver kemur þeim á. Gætið einkum að orðum konungs um Egil við Þóri hersi í lok dóms og sáttargjörðar. – Skoðið vísur 8, 9 og 10 vandlega.

12. Egill í víking. Egill er margbreytilegur karl, fljótur að skipta skapi og leynir ekki tilfinningum sínum þótt ekki hafi hann yfirleitt mörg orð um þær. Hvað einkennir Egil í hverri ferð? Hvernig tjáir hann tilfinningar sínar og hvaða kenndir er hann að láta í ljós. – Ferðirnar eru: Á Kúrlandi í víking, hernaður í Lundi og á Hallandi hjá jarlsdóttur. – Allir vita að sjálfsögðu hvar þessir staðir eru.

13. Enn skilja leiðir Mýramanna og konungsættarinnar með fullum fjandskap. Hvað veldur? Hvað er nú til ráða?

© Íslenskudeild FÁ