Jóhann Sigurjónsson
Um Strax eða aldrei og Bikarinn
Jóhann Sigurjónsson (1880 – 1919) er þekktur
fyrir leikrit sín og ljóð. Í þessum áfanga
einbeitum við okkur einungis að ljóðum hans en þekktustu
leikritin eftir hann eru Fjalla-Eyvindur (1911/1912) og Galdra-Loftur
(1915). Ljóðið Sofðu unga ástin mín (Þyrnar
30. bls.) er í Fjalla-Eyvindi og er vögguljóð sungið
af Höllu stuttu áður en byggðarmenn finna hæli
þeirra Evindar og Halla neyðist til að henda barninu í
fossinn til að það lendi ekki í höndum þeirra.
Eyvindur og Halla voru útilegumenn.
Jóhann er skilgreindur sem nýrómantískt skáld
og skáldið sem orti fyrsta óhefðbundna ljóðið.
Á leslista eru Strax eða aldrei, Bikarinn og Sorg.
Til þæginda er gott að skipta ljóðum Jóhanns
í þrennt. Fyrst eru ljóð sem bera sterk einkenni
nýrómantíkur, t.d. Strax eða aldrei. Næst
ljóð sem eru hefðbundin að formi en birta í
sér firringu 20. aldar, einmanaleika mannsins og tilvistarvanda,
dæmi Bikarinn (1910). Loks nútímaljóðið
Sorg (ort 1910, birt 1927).
Nýrómantísk ljóð
Strax eða aldrei er gott dæmi um íslenska nýrómantík.
Þar birtast hugmyndir um
snillinginn, ofurmennið, jafnframt óþreyjan að vinna
afrekin strax eða ekki. Einnig birtist þar þráin
eftir frelsi einstaklingsins. Myndmál og stílbrögð
einkennast af andstæðum.
Yfirborðsmynd ljóðsins (sagan) er einstaklingur sem á
sér stóra drauma, vill vinna afrek og það strax.
Hann hefur háleitar hugmyndir og vill ekki lifa hversdagslegu lífi
heldur skapa eitthvað mikilvægt. Jafnframt er hann reiðubúinn
að fórna öllu.
Í fyrstu tveimur línum eru tvær líkingar,
ég vildi sem fálkinn og mér leiðist sem ormur.
Sem er hér tengiorðið sem skilur á milli líkingar
og myndhverfingar, samanber stílfræðina.
Fálkinn og valurinn voru algeng tákn hins sterka, ofurmennisins,
snillingsins, í
nýrómantík. Ormurinn er tákn hins lítilvæga,
hversdagsþrælsins. Líkneski sem hann vill skapa úr
marmara er draumur um stóra afrekið. Og með líkneskinu
nýtir hann sér skapandi viljann.
Munurinn á hversdagsþrælnum sem mjakast áfram
fet fyrir fet í seinna erindi og
snillingnum sem vill lifa strax og ná árangri er síðan
meginefni seinna erindis. Og hann er reiðubúinn til að
fórna öllu eins og birtist sterkast í næst síðustu
línu. Síðasta línuna er síðan hægt
að túlka þannig að hann metur viðurkenningu samfélagsins
lítils ef hún birtist í ytri hlutum, virðulegur
embættismaður fær kannski gullroðna líkkistu
og hefur kannski hlotið orðu áður, en það
er ekki markmið mælandans. Hann vill annars konar viðurkenningu,
að hafa náð árangri með skapandi viljanum. Vera
viðurkenndur sem snillingur.
Dæmi um öfgar nýrómantíkur birtast líka
vel í tveimur öðrum ljóðum sem bera nafn eftir
fyrstu línunni. Allt sem þú gjörir það
gjör þú skjótt en það er í Þyrnum.
Annað ljóð er Væri ég aðeins einn af þessum
fáum en það er ekki í Þyrnum.
Hefðbundin ljóð um tilvistarvanda
Bikarinn er eitt þekktasta ljóðið í
upphafi 20. aldar sem sýnir, þó það sé
hefðbundið, hvað koma skal í skáldskap aldarinnar
en firring, einmanaleiki og tilvistarvandi eru þar áberandi.
Því miður eru önnur dæmi ekki í Þyrnum
en þekkt ljóð eru Heimþrá og Ódysseifur
hinn nýi og tvær sonnettur sem Jóhann orti og birta
þetta vel. Þær nefnast Fyrir utan glugga vinar míns
og Sonnetta.
Yfirborðsmynd Bikarsins (sagan) er maður sem situr vetrakvöld
einn að drykkju og upp rifjast gleði- og sorgartímar. Og
honum er ljós nærvera dauðans.
Styrkleiki ljóðsins er myndmálið, ein mynd er frá
upphafi til enda og myndin í upphafi er færð í
víðara samhengi í síðasta erindi.
Í fyrsta erindi ræður bein mynd, samanber stílfræðina.
Mælandinn situr einn að drykkju. Vert er að taka eftir notkun
orðanna en hátíðlegt orðalag og skáldlegt
einkennir ljóðið.Og hafa í sér algenga, táknræna
merkingu. Það er aftan (kvöld) og það er vetur.
Hvort tveggja merkir oft endalok lífsins, andstæðurnar
eru þá morgunn og vor sem fela í sér nýjar
vonir og afrek. Hvorugt er til staðar í þessu ljóði.
Og blómin eru gömul.
Persónugerving er áberandi í öðru erindi
ásamt andstæðum. Til að finna persónugervingu
er gott að skoða sagnir. Gleðin lifnar og sorgin grætur.
Hér eru huglæg fyrirbæri látin haga sér
eins og lifandi vera. Gleði og sorg eru andstæður sem er
algengt stílbragð í ljóðum og gott að
leita að þeim í öllum textum. Dapurleiki ræður
í erindinu þrátt fyrir að talað sé
um að gleðin lifni, enginn bjartsýnistónn því
gleðin er löngu liðin og sorgin grætur í annað
sinni.
Í þriðja erindi er síðan hámark ljóðsins,
myndinni í upphafi fylgt eftir og ljóðinu gefin víðtækari
merking. Hér er myndhverfing ráðandi. Dauðinn er
persónugerður, hann heldur sjálfur á bikar líkt
og mælandinn í upphafi, þó er bikar ekki nefndur
á nafn, heldur ber hann í hendi hyldjúpan næturhimin.
Hér er því um myndhverfingu að ræða.
Orðið hyldjúpur eykur áhrifin, er endalaus. En þar
sem bikar mælandans í fyrsta erindi ilmar af angan gamalla
blóma er bikar dauðans fullur af myrkri. Og myrkur er neikvætt.
Dauðbeygur nýrómantíkur birtist hér vel
ásamt einmanaleikanum. Mælandanum er ljós návist
dauðans og kannski liggur spurningin um tilgang lífsins undir
niðri, tilvistin.
© Kristinn Kristjánsson
|