|
|
|
Eiríkur Páll Eiríksson
Bókmenntir síðustu 30 ár 20. aldar
Um 1970 hafði umfjöllun um módernismann stolið senunni
í skáldsagnaumræðunni og á þeim áratugi
sem í hönd fór voru þeir höfundar sem vakið
höfðu athygli fyrir módernískar skáldsögur
afkastamiklir. Frá Guðbergi Bergssyni og Thor Vilhjálmssyni
komu margar bækur á áttunda áratugnum. Nýjasta
bók Guðbergs er barnabókin Hundurinn sem þráði
að verða frægur og Thor sendi síðast frá
sér skáldsögu 1998, Morgunþulu í stráum.
Báðir eru þeir afkastamiklir þýðendur.
Tíðarandinn
En um þetta leyti var ýmislegt að gerast í
þjóðlífinu sem átti eftir að setja
mark sitt á bókmenntir þessa tíma. Hippahreyfingin
var orðin útbreidd austan hafs og vestan og gagnrýnin
þjóðfélagsumræða fylgdi í kjölfar
þeirra viðhorfa sem sú hreyfing stóð fyrir.
Andúð á styrjaldarrekstri og barátta fyrir friði,
jafnrétti kynja og kynþátta er einkum það
sem hippahreyfingin gat af sér í umræðunni á
þeim tíma. Þessa fer brátt að sjá
stað í bókmenntunum og sem fyrr þegar mönnum
liggur mikið á hjarta duga engar vífilengjur, höfundar
verða að koma sér beint að efninu, lýsa vandanum
skýrt, greina vandann og taka afstöðu. Skáldsögur
með greinilegum söguþræði og skýrum boðskap
eru vel til þess fallnar að koma slíku söguefni
á framfæri við lesendur.
Nýraunsæi
Nú gengur enn í garð raunsæisskeið í
skáldsagnagerð, oft nefnt nýraunsæi. Það
er oft talið hefjast með tveggja binda skáldsögu Vésteins
Lúðvíkssonar, Gunnar og Kjartan (1971
72), en brátt komu fram ýmsar samfélagslegar skáldsögur
eftir unga höfunda. Má þar nefna auk Vésteins,
Ásu Sólveigu, Guðlaug Arason sem skrifaði m.a. Eldhúsmellur
en sú bók vakti mikla umræðu. Þetta nýraunsæi
myndaði mótvægi við módernismann sem þá
var enn á ný gagnrýndur fyrir að þjóna
ekki samfélagslegu hlutverki með skýrum hætti.
Kvennabókmenntir
Annað sem mjög var rætt á áttunda áratugnum
var svo sem ekkert nýmæli en vakti engu að síður
miklar deilur, hér er átt við umræðuna um
stöðu kvenna bæði í þjóðfélagi
og í bókmenntum. Þessi umræða gat af sér
mikilvægt afl í stjórnmálum, kvennalistann,
og í bókmenntum hratt þessi umræða af stað
talsverðri bókaútgafu á verkum kvenna. Má
þar sem dæmi nefna smásagnasafnið Draumur um
veruleika sem Helga Kress sá um útgáfu á
og ritaði formála að og Sögur íslenskra
kvenna1879 1960 sem er mikið rit sem Soffía Auður
Birgisdóttir valdi efni í úr skáldverkum kvenna.
Hún skrifar einnig eftirmála. Þessar bækur er
því ágætis sýnisbækur í
kvennabókmenntum. Umræðunni fylgdu svo rannsóknir
á stöðu kvenna í bókmenntum og samfélagi,
síðan þá er talað um kvennabókmenntir
með fullri virðingu en upp úr miðri 20. öld máttu
konur í rithöfundastétt þola að verk þeirra
væru nefnd kerlingabókmenntir eða bókmenntaumræðan
tók ekki til verka þeirra.
Samtími nemenda í skáldsagnagerð
Þeir nemendur sem þessi bókmenntasöguskrif
eru ætluð eru flestir fæddir um 1980. Hvaða bókmenntastefna
skyldi einkenna bókmenntir sem skrifaðar eru á þeirra
æviskeiði? Best væri auðvitað að nemendur
gætu svarað þessu sjálfir en líklega er
best að draga saman einhverjar vísbendingar um efnið.
Sagnamenn
Bókmenntafræðingar eru ekki á einu máli
um hvað einkenni bókmenntir síðustu tuttugu ára.
Sumir bókmenntamenn tala um að afturhvarf til hefðbundinnar
frásagnar einkenni síðustu tvo áratugi aldarinnar
og það sé nokkurs konar andóf gegn módernískum
skáldsögum sem ögrað hafi sagnahefð söguþjóðarinnar
með slitróttum söguþræði og tímalausu
framvinduleysi atburða. Sé þetta rétt eru bókmenntirnar
að verða hefðbundnar á nýjan leik. Dæmigerðir
sagnahöfundar / sögumenn eru þá oft nefndir Einar
Kárason, Pétur Gunnarsson, Einar Már Guðmundsson
í sumum verkum sínum a.m.k., Ólafur Gunnarsson og
Ólafur Jóhann Ólafsson. Hin hefðbundna frásagnarlist
er þá aðal þeirra.
Framhald formbyltingar ljóðrænn texti
Aðrir bókmenntamenn sjá fyrir sér að
módernisminn, jafnt erlendur sem íslenskur, hafi örvað
skáldsagnahöfunda til endurmats á þeirri formgerðarbyltingu
sem módernisminn olli á sjöunda og áttunda áratugnum.
Þannig verði sagnahefðin í ljósi umbrota módernismans
þeim kveikja að nýsköpun í eigin frásagnaraðferð
og gefi íslenskri skáldsagnagerð nýtt svipmót.
Þetta nýja svipmót einkennist af ljóðrænu
og myndvísi, textinn standi oftar en ekki á mótum
frásagnar og ljóðrænnar tjáningar. Afturhvarf
til frásagnarlistar einkenni ekki slíkar bókmenntir.
Slíka texta má finna í Tímaþjófinum
eftir Steinunni Sigurðardóttur, Hringsóli eftir
Álfrúnu Gunnlaugsdóttur, Skuggaboxi Þórarins
Eldjárns, Svefnhjóli Gyrðis Elíassonar
og Meðan nóttin líður eftir Fríðu
Á. Sigurðardóttur. Grámosinn glóir
eftir Thor Vilhjálmsson og Hjartað býr enn í
helli sínum eftir Guðberg Bergsson eru einnig í
þessum flokki bóka, sömuleiðis Vængjasláttur
í þakrennum eftir Einar Má Guðmundsson.
Töfraraunsæi
Enn aðrir bókmenntamenn segja að töfraraunsæi
einkenni skáldsögur tímabilsins. Hugtakið töfraraunsæi
(magic realism), sem upphaflega var notað um stefnu í myndlist
upp úr 1920, er nú haft til að lýsa lausamálsverkum
höfunda á borð við Jorge Luis Borges frá Argentínu,
Kólumbíumannsins Gabriel Garcia Marquez, Þjóðaverjans
Günter Grass og Englendingsins John Fowles. Þessir höfundar
flétta saman með ýmsum tilbrigðum hárbeittum
raunsæislýsingum á hversdagslegum atburðum og
smáatriðum og svo furðulegum og oft draumkenndum þáttum
og jafnvel efnisatriðum sem ættuð eru úr goðsögum
eða ævintýrum. Robert Scholes gerði fleygt hugtakið
metafiction sem á að ná yfir þann umfangsmikla
og sívaxandi flokk skáldsagna sem sker sig frá hinni
hefðbundnu tvískiptingu skáldsagna í raunsæi
og rómönsur. Hann notaði líka hugtakið fabulation
um þessa lausbeisluðu frásagnaaðferð í
nútíma skáldsagnagerð. Svona sögur þverbrjóta
venjubundnar viðmiðunarreglur í skáldsagnagerð
með djarfri og oft áhrifaríkri tilraunastarfsemi
í efnisvali, formi, stíl, tímaröðun og samruna
hins hversdagslega og ímyndaða, þess goðsagnakennda
og martraðarinnar í frásögnum sem þurrka
út öll hefðbundin mörk milli þess sem er alvarlegt
og fánýtt, hryllilegt og fáránlegt, harmrænt
og kátlegt.
Slíka texta má finna í Kaldaljósi og
Grandavegi 7 eftir Vigdísi Grímsdóttur, Eftirmála
regndropanna eftir Einar Má Guðmundsson, skáldsögum
Gyrðis Elíassonar, Bréfbátarigningunni,
Gangandi íkorna og Næturluktinni. Þá
er Gunnlaðarsaga Svövu Jakobsdóttur sumpart í þessum
flokki bóka.
Aldamótin
Í upphafi tuttugustu aldar voru Jón Trausti og Einar H.
Kvaran áberandi rithöfundar, þeir tilheyra aldamótakynslóð
þess tíma. En hverjir munu skipa aldamótakynslóð
rithöfunda okkar daga? Sagan sker úr um það. Um
hvaða höfunda og bókmenntastefnur munu nemendur í
skólum við næstu aldamót fræðast sem
höfuðskáld og meginstrauma bókmentanna í
byrjun 21. aldar? Það kemur líka í ljós.
Bókmenntastefna síðustu ára er stundum nefnd
póstmódernismi. Ekki eru allir á einu máli
um hvað póstmódernismi er, sumir hallast að því
að samhæfing hefðar í raunsæi og módernisma
sé einkenni póstmódernismans en aðrir telja að
hann felist í fjölhyggju með beinum og óbeinum
vísunum í önnur verk, póstmódernismi
sé stefnulaus, hafni hugmyndafræði og afstöðu-
og skeytingarleysi sé áberandi, tilviljun ráði
för hvert texti leiðist og hann lúti engum rökum.
Áberandi höfundar yngstu kynslóðar
rithöfunda eru þessa dagana t.d. Bjarni Bjarnason, Hallgrímur
Helgason, Mikael Torfason, Guðrún Eva Mínervudóttir,
Bragi Ólafsson, Steinar Bragi, Auður Ólafsdóttir
og Auður Jónsdóttir. Þau eru ekki einsleitur hópur
í bókmenntum og falla ekki að einni stefnu. Hvað
svo?
Ljóðskáld
Til viðbótar þeim módernistum sem taldir eru í
fyrri kafla voru áhrifamikil ljóðskáld um 1970
þau Hannes Pétursson, Vilborg Dagbjartsdóttir, Matthías
Johannessen, Þorsteinn frá Hamri, Snorri Hjartarson, Ólafur
Jóhann Sigurðsson. Þessi ljóðskáld
auk módernistanna eða Birtingsmanna voru góðkunn
skáld þegar hér er komið sögu. Eftir þau
eru margar ljóðabækur sem allir ljóðaunnendur
kynna sér einhvern tíma á lífsleiðinni.
Mörg fleiri ljóðskáld koma viðsögu bókmenntanna
og handhægast fyrir nemendur er að kynnast þeim í
kennslubókinni Þyrnum og rósum.
Hvar er ljóðið?
Árið 1974 var haldin þjóðhátið
á Þingvöllum til að minnast 1100 ára byggð
á Íslandi. Efnt var til samkeppni um þjóðhátíðarljóð
en það hafði verið gert 1944 með góðum
árangri eins og fyrr var nefnt. Nú bar svo við að
ekkert ljóð var verðlaunað af þeim sem bárust
í samkeppnina en ljóðlaus skyldi þjóðin
ekki á lýðveldisafmælinu, Tómas skáld
Guðmundsson orti umbeðinn þjóðhátíðarljóð
sem flutt var á hátíðinni. Um nýliðin
aldamót kom ekkert aldamótaljóð fram.
Er þá ljóðið dautt? Ekki er það
nú svo en þessu hlutverki þjónar það
ekki lengur í þjóðlífinu.
Ný nálgun ljóðsins
Líklega er ljóðið enn talsverður þáttur
í lífi okkar en það kemur til okkar með öðrum
hætti en fyrri kynslóða. Ljóðið talar
ekki bara til okkar úr hefðbundinni ljóðabók,
heldur einnig í fjölmörgum textum á plötum,
diskum og spólum, meistarar poppsins, eins og Dylan og Lennon eiga
sér marga lærisveina og samherja um allan heim, líka
hérlendis og ljóð skáldanna verða fyrir áhrifum
úr ýmsum áttum. Megas er ljóðskáld
sem allir þekkja þótt vafist gæti fyrir okkur
að nefna eftir hann ljóðabók.
Fyrir ljóðaunnendur
Bókin Nýgræðingar í ljóðagerð
1970 1981 eftir Eystein Þorvaldsson hefur að geyma
ljóð 36 skálda sem voru að birta fyrstu ljóð
sín um 1970. Þar er ágætur formáli sem
gerir grein fyrir megináherslum og viðhorfum í ljóðlist
sem voru að verða áberandi um 1970 í kjölfar
atburða sem þá höfðu áhrif um allan heim,
stúdentaóeirða, Víetnam, Tékkóslóvakíu,
hippamenningar og Bítla.
Eysteinn hefur gefið út annað safnrit með ljóðum
ungskálda: Nýmæli. Ljóð ungskálda
1982 86. Ljóðormur nefnist og safnrit sem
Eysteinn hefur ritstýrt með öðrum, það rit
má vel nefna sýnisbók ljóðlistar síðustu
ára. Þessi yfirlitsrit eru kjörin fyrir þá
sem vilja skoða ný ljóð og velta vöngum yfir
stöðu ljóðsins. Margir af þekktustu höfundum
samtímans hafa hafið rithöfundarferil sinn með ljóðabók.
Þar má nefna Einar Má Guðmundsson, Pétur
Gunnarsson, Steinunni Sigurðardótur, Ólaf Hauk Símaonarson
og Þórarin Eldjárn. Fyrir jólin 2001 kom út
Ljóð ungra skálda og hefur að geyma það
nýjasta í ljóðagerðinni í byrjun nýrrar
aldar.
Aðrar bókmenntagreinar
Þótt hér að framan hafi mest verið rætt
um skáldsögur og ljóð er heimur bókmenntanna
auðvitað stærri en svo að hann einskorðist við
skáldsögur og ljóð. Sögulegar skáldsögur
eða heimildaskáldsögur er vinsælt lestrarefni og
kunnar sögur í þessum flokki bóka eru t.d. Lífsins
tré og Híbýli vindanna eftir Böðvar
Guðmundsson, Haustskip eftir Björn Th. Björnsson,
Yfirvaldið eftir Þorgeir Þorgeirsson sem kunnari
var lengi vel fyrir kvikmyndir en skáldsagnaskrif. Saga Þórunnar
Valdimarsdóttur um Snorra á Húsafelli og bók
hennar Stúlka með fingur eru í þessum flokki
bóka.
Öldin var viðburðarík og margir mundu tímana
tvenna og sér þess stað í mörgum ævisögum.
Sumar ævisögurnar eru hefðbundnar, t.d. Fátækt
fólk eftir Tryggva Emilsson verkamann á Akureyri. Aðrar
eru með mismiklu skáldskaparlegu ívafi, þannig
er um sögu Jakobs Jóhannessonar eftir Sigurð A. Magnússon
en fyrsta bindi hennar Undir kalstjörnu kom út 1979.
Mörg skáld skrifuðu endurminningar sínar, Halldór
Laxness 4 bindi, Jón Óskar 6 bindi og nú síðast
hefur Guðbergur Bergsson skrifað tveggja binda verk, skáldævisögu
sína er hann nefnir Faðir og móðir og dulmagn
bernskunnar og Eins og steinn sem hafið fágar. Bernskan
hefur á þessu skeiði verið fyrirferðarmikið
yrkisefni í bókmenntum, sagnabálkur Péturs
Gunnarssonar um Andra Haraldsson sem hefst á Punktur, punktur,
komma, strik og Riddarar hringstigans eftir Einar Má
Guðmundsson eru bernskuminningar.
Smásögur
Smásagan lifir sem fyrr góðu lífi og margir
höfundar hafa sent frá sér smásagnasöfn.
Helsta nýjung tímabilsins í smásagnagerð
er örsagan, slíka texta má t.d. finna í verkum
Kjartans Árnasonar, Elísabetar Jökulsdóttur
og Kristínar Ómarsdóttur. Í smásögum
Gyrðis Elíassonar, Sigfúsar Bjartmarssonar og Ísaks
Harðarsonar virðast töluverð nýbreytni vera innan
smásagnagerðarinnar en Svava Jakobsdóttir hefur lengi
fengist við nýsköpun í smásagnagerð.
Íslenskar bókmenntir á Norðurlöndum
Lengi vel stóðu íslensk skáld og íslenskar
bómenntir í skugganum af Nóbelsverðlaunum Halldórs
Laxness 1955. Síðustu 25 árin hafa verið gróskumikil
í íslenskum bókmenntum og bæði ljóð-
og sagnaskáld fengið verðskuldaða viðurkenningu
erlendis á vettvangi Norðurlandaráðs. Skáldið
Ólafur Jóhann Sigurðsson fékk Bókmenntaverðlaun
Norðurlandaráðs fyrir ljóðabækurnar
Að laufferjum og Að brunnum 1976. Ljóðskáldið
Snorri Hjartarson fékk Bókmenntaverðlaun Norðurlandaráðs
fyrir ljóðabókina Hauströkkrið yfir mér
1981. Þrjú íslensk sagnaskáld hafa fengið
þessi sömu verðlaun: Thor Vilhjálmsson fyrir Grámosinn
glóir 1986, Fríða Á. Sigurðardóttir
fyrir Meðan nóttin líður 1992. Einar Már
Guðmundsson fyrir Engla alheimsins 1995 og Sjón fyrir
Skuggabaldur árið 2005.. Hrafnhildur Hagalín
Guðmundsdóttir fékk Norrænu leikritaverðlaunin
fyrir leikritið Ég er meistarinn og Guðrún
Helgadóttir fékk Norrænu barnabókaverðlaunin
fyrir sögu sína Undan illgresinu. Arnaldur Indriðason
fékk árið 2002 verðlaun fyrir bestu norrænu
glæpasöguna fyrir bók sína Mýrin og
árið eftir sömu verðlaun fyrir Grafarþögn.
Og árið 2005 fékk hann bresku glæpasöguverðlaunin,
Gullna rýtinginn, fyrir Grafarþögn en Gullrni rýtingurinn
þykir með virðulegri verðlaunum heims fyrir glæpasögur.
© Eiríkur Páll Eiríksson
|
|
|