|
|
|
Eiríkur Páll Eiríksson
Vandamál líðandi stundar
Raunsæi frá 1930 1950 / 1965
Hvað var að gerast?
Það er einkenni raunsæisbókmennta að taka
á vandamálum líðandi stundar, skoða þau
og skilgreina og leita leiða til úrbóta en deila jafnframt
á þá sem á einhvern hátt þykja
breyta rangt ef hagsmunir heildarinnar eru hafðir í huga. Á
áratugunum 1930 1955 var margt sem gekk á í
íslensku þjóðlífi og endurspeglast það
með margvíslegum hætti í bókmenntum tímabilsins.
Kreppan skall á 1929, heimsstyrjöldin síðari braust
út 1939, Ísland varð lýðveldi 1944, Keflavíkursamningurinn
var gerður 1946 og Ísland gekk í Atlantshafsbandalagið
1949. Svo komu bandarískir hermenn til landsins 1951 vegna Kóreustríðsins.
Miklir búferlaflutningar urðu úr sveitum landsins og
ásýnd þjóðlífsins breyttist. Til
alls þessa tóku skáldin afstöðu og fjalla
um, einkum í skáldsögum. Um atburði áratugarins
milli 1950 60 er fjallað í næsta kafla.
Afmörkun tímabilsins
Upphaf þessa bókmenntaskeiðs er best að miða
við það ár þegar Íslendingar fóru
að finna fyrir áhrifum heimskreppunnar miklu. Stjórnmálalegt
umrót hafði verið í landinu, nýir stjórnmálaflokkar
verið stofnaðir í kjölfar breytinga í þjóðmálum
en mál málanna, sjálfstæðisbaráttan,
var nú að mestu til lykta leidd og menn ekki eins uppteknir
af henni og löngum fyrr. Kaupstaðirnir voru að stækka,
Reykjavík að fá á sig borgarbrag og stéttaandstæður
bilið milli ríkra og fátækra að
skerpast. Verkalýðshreyfingin var að eflast og pólitísk
umsvif hennar fóru vaxandi, Alþýðuflokkurinn var
stofnaður 1916 um leið og Alþýðusamband Íslands
en árið 1930 stofnuðu þeir sem þótti
sá flokkur ekki vera nógu skeleggur í að koma
á sósialískum þjóðfélagsumbótum
Kommúnistaflokk Íslands.
Lok þessa bókmenntaskeiðs eru óljós að
því leyti að raunsæisskáldssagan er miklu
langlífari en raunsæisljóðið. Um 1955 var
að verða ljóst að Sovétríkin gátu
ekki orðið það forystuafl þjóðfélagslegra
umbóta sem margir bundu vonir við og sýndu þau
það svart á hvítu ári síðar
með innrás í Ungverjaland árið 1956, þetta
olli fráhvarfi margra frá hugmyndafræði sósíalista.
Skömmu áður 1950 hafði formbylting í
ljóðagerð skekið íslenskt þjóðlíf
þegar atómskáldin geystust fram með skáldskap
sinn. Upp úr 1950 fóru fyrstu smásögur í
módernískum stíl að líta dagsins ljós
í uppreisn gegn raunsæissagnahefðinni en fimmtán
árum síðar gerðist það sama innan skáldsögunnar.
Raunsæisljóðið lætur þannig undan síga
um 1950 en raunsæissagan um 1965.
Raunsæi er oft skipt í tvennt: Félagslegt raunsæi
og þjóðfélagslegt raunsæi.
Félagslegt raunsæi / sósíalískt raunsæi
Félagslegt raunsæi hefur sósíalískan
boðskap að leiðarljósi og snýst gegn borgaralegum
venjum og hugmyndum. Markmiðið er breytt þjóðfélagsskipan
í anda sósíalískra lífsskoðana
og stjórnarhátta. Þetta raunsæi er sjaldgæft
í íslenskum bókmenntum, dæmi um það
eru sögulok í Sjálfstæðu fólki
eftir Laxness og sumpart í smásögunni Móður
barnanna eftir Guðmund G. Hagalín (1898 1985). Þá
eru kvæði frá fjórða áratug aldarinnar
sem fella má að þessari bókmenntastefnu og er
oft vitnað í kvæði Jóhannesar úr Kötlum
Sovét Ísland sem dæmigert að þessu
leyti. Fylgjendur sósíalísks raunsæis gáfu
út tímaritið Rauða penna í nokkur
ár.
Þjóðfélagslegt raunsæi
Þjóðfélagslegt raunsæi tekur á
vandamálum samtímans. Sögurnar gerast í samtíma
höfundar, þær fjalla um þá sem minna mega
sín og deila oft á auðstétt og yfirvöld.
Samúð höfundar er með lágstéttarfólki
og stéttaskipting, ranglæti eða óverðskuldaður
aðstöðumunur er ekkert launungarmál í þessum
sögum. Líf sögupersóna mótast af kjörum
þeirra. Höfundar benda á samfélagslegan eða
mannlegan vanda og lýsa honum en lausn hans felst ekki í
þjóðfélagsbyltingu heldur er um flóknara
ferli að ræða. Bakgrunnur höfunda er ólíkur
og þeir hafa ólíkar stjórnmálaskoðanir
en taka þau mál til meðferðar sem þeir telja
brýn úrlausnar eða allrar athygli verð. Hégómi
eftir Halldór sýnir hvernig kona af yfirstétt getur
ekki sætt sig við nýja, ömurlega stöðu
sína, sýslumannsdóttirin og kaupmannsfrúin
er orðin öreigi. Og Guðmundur G. Hagalín greinir frá
hvernig Kristrún í Hamravík gerir allt til að
halda bænum í byggð. Nokkur meginefni þessarar
bókmenntagreinar verða rakin hér í næsta
kafla.
Efni raunsæissagna
Kjör verkafólks og bænda er viðfangsefni í
sögum Laxness frá fjórða áratugnum,
t.d. Sölku Völku og Sjálfstæðu fólki.
Að auka almenningi stéttarvitund og stuðla að pólitískri
vakningu er tilgangur slíkra bóka.
Andstæður dreifbýlis og borgar eru fyrirferðarmest
efni í raunsæissögum, fólk streymir úr
sveitinni og framtíðin á mölinni er óvís.
Þeir þjóðflutningar eru viðfangsefni hjá
tveimur höfundum sem báðir gefa út fyrstu bók
í þríleik (tríólógíu)
árið 1955. Hjá Ólafi Jóhanni Sigurðssyni
(1918 1988) er hið liðna og horfna umvafið rómantískum
hillingablæ en veruleiki nútímans nöturlegur
og einkennist af eftirsókn eftir vindi. Þetta kemur vel fram
í þríleik hans sem samanstóð af bókunum
Gangvirkið (1955), Seiður og hélog (1977) (hélog
merkir villiljós) og Drekar og smáfuglar (1983). Hjá
Indriða G. Þorsteinssyni (1926 2000) eru breytingarnar
óumflýjanlegar og nútíminn dæmdur vægar.
Land og synir (1963) lýsir ástandinu í sveitinni
áður en bóndasonurinn flytur á mölina. Norðan
við stríð (1971) lýsir áhrifum heimsstyrjaldarinnar
og þeim samfélagsbreytingum sem verða í kjölfar
hernámsins. Og 79 af stöðinni (1955) lýsir
sveitamanninum fluttum á mölina, bóndasonurinn orðinn
leigubílstjóri en gengur illa að fóta sig. Þar
koma líka áhrif bandaríska hersins á daglegt
líf landans við sögu.
Eftir að herinn kom í landið 1940 gekk þjóðernisrómantík
í endurnýjun lífdaga, og barátta gegn erlendu
valdi hófst á ný. Atómstöðin
(1948) eftir Laxness tekur á þessum málum öllum.
Þórubækur (1954 1964) Ragnheiðar Jónsdóttur
(1895 1967) lýsa sömuleiðis þeim vanda sem
búferlaflutningar og herseta hafði í för með
sér.
Lífið í Reykjavík verður mörgum
yrkisefni. Þórunn Elfa Magnúsdóttir (1910),
mamma Megasar, glímir við vanda Reykjavíkurlífsins
og spilling borgarinnar í samanburði við hreinleika sveitarinnar
er áleitið efni Reykjavíkursagna hjá mörgum
höfundum. Elías Mar (f. 1924) varð fyrstur til að
lýsa lífi nútímaunglinga í skáldsögunni
Vögguvísa (1950), unglingar á glapstigum eru
aðalpersónur og slangur og slettur óspart notað
til að afmarka umhverfið.
Sveitasögur þar sem höfundar spila á nostalgískar
(angurværar) taugar lesenda ná vinsældum undir lok
tímabilsins. Sögurnar gerast í sveit og lýsa
rómantískum tíma, sem er horfinn og kemur aldrei
aftur, á raunsæjan hátt að mati lesanda. Sögur
Guðrúnar frá Lundi (1897 1875) (t.d. Dalalíf
1946 1951) eru dæmi um þessar bókmenntir en
hún var um skeið mest lesni höfundur landsins og metsöluhöfundur
jafnframt.
Þýddar skáldsögur eru fyrirferðarmiklar
í íslenskri bókaútgáfu á þessum
árum og margir þekktir höfundar sem komu að því
að þýða erlend öndvegisrit. Bókaforlagið
Mál og menning var m.a. stofnað til að koma þýddum
skáldsögum á ódýran hátt til almennings.
Það sama á við um Almenna bókafélagið
en þessi félög tókust á um bókmenntasmekk
almennings fram á sjöunda áratuginn.
Barnabækur verða sérstök bókmenntagrein
á tímum raunsæis. Sögurnar höfðu það
að markmiði að upplýsa börn um blákaldan
raunveruleika þjóðfélagsins. Brugðið er
upp trúverðugum myndum af erfiðum kjörum barna og
barnafjölskyldna, t.d. vegna fátæktar foreldra eða
dauðsfalls og unnið úr þeim vanda. Söguhetjur
eru borgarbörn og lausn á vanda þeirra er oft að
finna í óspilltri sveit eða í kynnum af góðu
fólki. Gunnar M. Magnús (1898 1988) og Stefán
Jónsson (1905 1966) kennarar við Austurbæjarskóla
eru dæmigerðir höfundar slíkra sagna. .
Raunsæi í ljóðagerð
Raunsæisljóðið er í eðli sínu
ádeilukvæði enda hentar það vel til að
koma til skila knappri, beiskri ádeilu. Frá þessum
áratugum er til mikill fjöldi slíkra ljóða
en þeir höfundar sem hófu hina raunsæju ljóðagerð
á ný í íslenskum bókmenntum voru einkum
Steinn Steinarr (1908 1958) með ljóðabókinni
Rauður loginn brann (1934) og Jóhannes úr Kötlum
(1899 1972) með bókinn Samt mun ég vaka
(1935). Upphaf róttækar raunsæisljóða er
sett árið 1930 þegar út kom ljóðabókin
Hamar og sigð eftir Sigurð Einarsson (1898 1967).
Þjóðernisrómantík er í bland við
róttækan boðskap höfunda þegar á líður.
Dæmi um þessa ljóðagerð má sjá
í Þyrnum og rósum í nokkrum kvæðum
frá fjórða áratugnum.
Í raunsæisljóðum er mest lagt upp úr
boðskap og innihaldi og formið má ekki trufla þessa
þætti. Raunsæisljóð eru því
flest hefðbundin og meðan mestur krafturinn var í hinu
pólitíska raunsæi varð hlé á þeirri
formbreytingu sem hófst um aldamót og náði
mestu blóma á öðrum og þriðja áratug
aldarinnar. Umræður um ljóðform eru sígilt
viðfangsefni, í Sjálfstæðu fólki
deila þeir Bjartur og Einar í Undirhlíð um ljóðformið
og sýnist sitt hverjum, um síðir yrkir Bjartur meira
að segja nútímaljóð að eigin sögn!
En það hlé sem varð á endurnýjun ljóðformsins
á fjórða áratugnum var aðeins lognið
á undan storminum
Einn af frumkvöðlum raunsæisljóða, Jóhannes
úr Kötlum, á sér merkilegan skáldskaparferil.
Hann hóf ferilinn sem nýrómantískt ungmennafélagsskáld,
gerðist róttækt raunsæisskáld og boðberi
kommúnisma en tók að yrkja nútímaljóð
á fimmta áratugnum undir dulnefninu Anónymus sem
merkir hinn nafnlausi. Um þennan merkilega skáldskaparferil
má fræðast á vefnum um Jóhannes
úr Kötlum sem hægt er að krækja í af
heimasíðu þessa áfanga. Jóhannes deildi
skáldaverðlaunum með Huldu á lýðveldishátíðinni
1944 fyrir kvæðið Land míns föður.
Ljóðaferill Steins Steinarr er líka fróðlegur
í þessu sambandi. Hann byrjar sem róttækt skáld
(Rauður loginn brann), fer yfir í efahyggju (Ljóð,
Spor í sandi og Ferð án fyrirheits) og endar í
að yrkja Tímann og vatnið.
Ættjarðarljóð
Eftir lýðveldisstofnun hljóp vöxtur í
þjóðernisrómantísk ljóð af ýmsum
toga. Sum ljóð er nánast ættjarðarljóð,
ástarjátningar til lands, þjóðar og tungu
en önnur eru ádeilukvæði þar sem deilt er
á hersetu og hernaðarbrölt. Snorri Hjartarson (1906
1986) og Guðmundur Böðvarsson (1904 1974) eru dæmigerðir
höfundar slíkra ljóða og auðvitað Jóhannes
úr Kötlum sem er alls staðar. Í Þyrnum og
rósum er líka vert að skoða ljóð sem
merkt eru á heimasíðunni undir verkefni 1940
1965: Vandamál líðandi stundar. II. hluti. Ættjörðin,
lýðveldið, herinn.
Raunsæissmásagan kemur með Verðandimönnum
inn í íslenskar bókmenntir. Í smásögunni
eru tekin til umfjöllunar ýmis þjóðfélagsleg
efni en algengt minni þessara sagna er smælingjaminnið,
kjör og örlög þeirra sem minna mega sín er
meginviðfangsefni þessara sagna og jafnframt er bent á
ábyrgð samfélagsins og valdafar eða aðrir þeir
sem ábyrgð bera eru dregnir til ábyrgðar og verða
skotspónar ádeilu.
© Eiríkur Páll Eiríksson
|
|
|