|
|
|
Eiríkur Páll Eiríksson
Íslensk málstefna
Hér er fjallað um íslenska málstefnu, hvernig
hún á rætur sínar í hreintungustefnu
en hefur færst yfir í nýyrðastefnu þar
sem málrækt, málvernd og málvöndun eru
lykilorðin.
Móðurmál er mönnum andlegt umhverfi
og sá sem týnir því glatar hluta af uppruna
sínum.
Málstefna
Íslensk málstefna kemur í ljós með
ýmsum hætti. Nefna má þar lög, reglugerðir
eða opinberar auglýsingar um margt er varðar íslenskt
mál, t.d. stafsetningu og nöfn á íslenskum fyrirtækjum,
er skulu samrýmast íslensku málkerfi. Enn má
nefna opinber fyrirmæli til kennara í ýmsum fræðigreinumum
að glæða skilning á mikilvægi ljósrar
framsetningar og vandaðs málfars.
Íslensk málnefnd
Íslensk málstefna birtist einnig skýrt í
lögum um Íslenska málnefnd. Þar segir m.a. að
hún hafi það meginhlutverk að vinna að eflingu
íslenskrar tungu og varðveislu hennar í ræðu
og riti. Nefndin skal vera stjórnvöldum til ráðuneytis
um íslenskt mál og hafa góða samvinnu við
þá er hafa áhrif á málfar almennings.
Henni ber að veita almenningi og opinberum stofnunum leiðbeiningar
um málfarsleg efni. Málnefndin skal annast söfnun nýyrða
og vera til aðstoðar við val þeirra. Hún skal
vinna að skipulagðri nýyrðastarfsemi og hafa samvinnu
við orðanefndir. Málstefnunni er framfylgt með málrækt,
málvernd og málvöndun.
Þessi málstefna á rætur í hreintungustefnu
málhreinsun en birtist í dag í nýyrðastefnu.
Hreintungustefna
Hreintungustefna felur í sér viðnám gegn
áhrifum erlendra tungna á móðurmálið.
Oft er einnig spornað við nýjungum/málbreytingum,
sem taldar eru óæskilegar, jafnskjótt og þær
koma upp jafnvel þótt þær geti ekki átt
rætur að rekja til erlendra mála. Íslensk hreintungustefna
málhreinsun gengur hins vegar lengra en tíðast
er. Hún beinist ekki aðeins gegn erlendum áhrifum og
óæskilegum hræringum í málinu, heldur
hefur hún á stundum stefnt að því að
hverfa aftur til gullaldarmáls og endurvekja málfarsleg
atriði sem eru útdauð í máli samtímans.
Nýyrðastefna
Það málræktar- og málverndunarstarf
sem felst í nýyrðasmíð er nátengt
málhreinsun því að megintilgangur nýyrðasmíðar
er að koma í veg fyrir að erlend orð komist inn í
málið og móti ásýnd þess. Nýyrðastefna
sú sem fylgt hefur verið hér á landi í
framhaldi af hreintungustefnunni er einn af hornsteinum íslenskrar
málstefnu og málverndar. Hin hraða þróun
samfélagsins kallar sífellt á ný orð,
við því hafa stjórnvöld brugðist með
því að fela Íslenskri málnefnd að hafa
forgöngu um og stjórn á nýyrðasmíðinni
og útgáfu nýyrða. Tilgangur hreintungustefnu
og nýyrðasmíðar er sá að halda lifandi
samhengi í máli kynslóðanna og auka málvitund
manna með markvissu málræktarstarfi þannig að
tungan njóti þess vaxtarmáttar sem í henni
býr. Útlendu orðin minna á hvernig ásýnd
málsins yrði ef ekki væri markvisst unnið að
endurnýjun orðaforðans.
Endurnýjun orðaforðans verður með þessum
hætti:
a) Nýmyndun orða og orð dregin af íslenskum stofnum.
Þessi orð eru gegnsæ. Algeng orð eru t.d: tölva/computer,
þota/jetfly, togari/trawler, vindlingur/cigarette, hreyfill/motor,
vél/maskine, ratsjá/radar, ljósvaki/æter sjónvarp/fjernsyn,
útvarp eller hljóðvarp/radio, mállýska/dialekt.
Öll málfræð- og stærðfræðihugtök
eru til á íslensku. Fagmál, íðorð
eru yfirleitt íslensk.
b) Ný merking gamalla orða. Nýmerkingar, t.d.: sími/telephone,
skjár/fjernsynsskærm, snælda/kasettebånd, álver/aluminiumfabrikk,
þulur/radio- eller fjernsynsspeaker, mjólkurferna/mælkkarton,
þyrla/helikopter, vinnukonur eller þurrkur/wipers, skott/bagagerum.
c) Þýðingar orða, t.d.: mjólkurhristingur/
milkshake, samviska/samvittighed, conscientia, geimskip/rumskib, spaceship,
tækni/teknik, róttækur/radikal, samúð/condolence,
andúð/antipat, fjölmiðill/massmedia eller multimedia,
lyklaborð/keyboard, krabbamein/cancer, jafnaðarmaður/socialdemokrat.
d) Lærð orðmyndun sérfræðinga, t.d. á
Íslenskri málstöð, t.d.: mótald/modem, ýridós/spreyflaske,
skruna/scroll, hönnuður no. hanna v./designer/design, berklar/tuberkulosis.
e) Samsetningar gamalla orðstofna á nýjan hátt,
t.d.: myndvarpi/projector, myndband/video, plötusnúður/disc-jockey,
flatbaka/pizza, sjónauki/kikkert, vélarhlíf/hood,
smásjá/mikroskop, veðurfræðingur/meteorolog,
kransæðastífla/infarctus myocardii.
f) Tökuorð, t.d.: trukkur/lastbil, jeppi/jeep, traktor (ísl.
dráttarvél)/tractor, hamborgari (ísl kjöthleifur
í brauði)/hamburger, gír/gear, bremsa (ísl. hemill)/,
sjoppa (ísl. söluturn)/shop, bíó (ísl.
kvikmyndahús)/bio, kommúnisti (ísl sameignarsinni)/kommunist,
kapitalisti (ísl. auðmagnssinni)/capitalist, sósíalisti
(ísl. félagshyggjumaður)/socialist.
Tökuorð fá íslenskar beygingarendingar og laga
framburð að hljóðkerfinu. Stafsetning tökuorða
er íslensk: Bridds, djús, djass, meik, nælon.
Málrækt felur í sér bæði eflingu
málsins og varðveislu/vernd þess.
Málrækt
Málrækt felur í sér bæði eflingu
málsins og varðveislu/vernd þess. Með eflingu
málsins er átt við að stækka orðaforða
þess og auka fjölbreytni í orðalagi, einnig að
styrkja málsamfélagið með því að
stuðla að því að málnotendur nái
sem bestu valdi á málinu, og enn fremur að styrkja trú
á gildi tungunnar. Málrækt er hugtak sem notað
er í nánum tengslum við nýyrðastefnu. Varðveisla
málsins felst í því að að halda gerð
þess óbreyttri og raska ekki stórlega merkingum orða
og orðasambanda og viðhalda þannig samhengi í
íslensku máli milli kynslóða.
Málvernd
Málvernd felur í sér að halda fast
við formkerfi málsis, beygingu og orðskipan / setningagerð
og jafnvel hljóðkerfi og hljóðskipan. Vegna málverndunarsjónarmiða
er litið svo á að málið hafi tekið litlum
breytingu milli kynslóða og hver kynslóð lesi mál
annarrar fyrirhafnarlítið. Sömuleiðis hefur málið
ekki gliðnað í mállýskur eftir landshlutum
og stéttum og talmálið stendur ritmálinu nær
en gengur og gerist víða erlendis. Málvernd er hugtak
sem sprottið er upp í tengslum við hreintungustefnu. Málvernd
og málrækt eru greinar á sama meiði.
Málvöndun
Það er nefnt málvöndun þegar menn reyna
að haga máli sínu þannig að það
gegni sem best því hlutverki sem því er ætlað
hverju sinni, sé smekklegt, lipurt og laust við orðalag
og orðmyndir sem eiga ekki við í því málsniði
sem um er að ræða. Málvöndun felur þá
í sér að nota ekki slettur í vönduðu,
formlegu máli þar sem þær eiga ekki við.
Málvöndun felst líka í því að
kunna málfræðilega skil á réttu máli
og röngu og hafa smekk fyrir góðu máli en
forðast vont mál, óviðeigandi, kauðalegt eða
klúðurslegt. Rétt stafsetning er þýðingarmikill
hluti málvöndunar.
Markmið málræktar
Móðurmál er mönnum andlegt umhverfi og sá
sem týnir því glatar hluta af uppruna sínum.
Heimildir
Efni í þessari kynningu er sótt í bækur,
blöð og tímarit þar sem fjallað hefur verið
um íslenska málstefnu. Þessi rit eru: Íslensk
málhreinsun, Mál og samfélag, Skíma 2. tbl.
78 og 1. tbl. 85 og Íslenskt málfar. Ýmist er um
beinar tilvitnanir að ræða eða dregið er saman
efni úr heimildum. Höfundar þess efnis sem byggt er
á eru Ólafur M. Oddson, Kjartan G Ottósson, Baldur
Jónsson, Höskuldur Þráinsson og Árni
Böðvarsson.
© Efni: Eiríkur Páll Eiríksson.
|
|
|