Ísl 503
Ísl 503				Sjálfstætt fólk Halldór Laxness er einn mikilvægasti rithöfundur Íslendinga og því verðugt að löng skáldsaga eftir hann, Sjálfstætt fólk, sé lesin í áfanga sem fjallar um bókmenntir 20. aldar. Markmiðið er að nemendur fái glögga yfirsýn yfir stöðu Sjálfstæðs fólks meðal verka Halldórs Laxness og í íslenskri bókmenntasögu 20. aldar, skilji mikilvægi sögunnar í þjóðfélagsumræðu síns tíma, ræði persónur sögunnar og atburði og velti fyrir sér hvernig hægt sé að túlka verkið. Sjálfstætt fólk kom fyrst út í tveimur bindum árin 1934 og 1935. Bókin skiptist í fjóra hluta: Landnámsmaður Íslands, Skuldlaust bú, Erfiðir tímar og Veltiár. Enn fremur eru Sögulok. – Nemendur mega nota hvaða útgáfu af verkinu sem er. Í dagskóla fær hver bók Sjálfstæðs fólks um það bil eina viku. Vikan byrjar á krossaprófi úr bókinni, síðan verða verkefni og umræður. Nemendur í dagskóla taka þannig krossapróf úr öllum bókum verksins, taka þátt í umræðum í hópvinnu og taka að lokum próf úr öllu verkinu. Upplýsingar fyrir nemendur í fjarnámi eru á heimasíðu áfangans í WebCT-kennsluumhverfi. Ítarefni Til að auðvelda sér lestur bókarinnar getur verið gott að líta í bókmenntakver um Sjálfstætt fólk eftir Véstein Ólason. Þar er sagt frá skáldinu og stöðu mála á þeim tíma sem verkið kemur út. En fremur eru spurningar við hverja bók. Vésteinn Ólason. 1983. Sjálfstætt fólk eftir Halldór Laxness. Bókmenntakver Máls og menningar. Mál og menning, Reykjavík. Nokkrir vefir eru til um Laxness og er hægt að finna þá undir Krækjur.