Horn eru styrkleikatákn, enda eru þau vopn og stolt þeirra dýra sem bera þau. Múkur bogi í hornum nauta, geithafra og hrúta tengdi þessi dýr mánagyðjunum og himinguðum yfirleitt. Horn urðu einnig tákn fyrir frjósemi, því að þau einkenna sérstaklega karldýr sem helga sér hópa af kvendýrum, einkum hirti; hjartarhorn urðu enda sérstök lífstákn vegna fjölbreytileika síns, árlegrar endurnýjunar og vaxtar. Enn þann dag í dag trúa menn á frjósemismátt horna og kaupa dýrum dómum duft úr nashyrningshorni til þess að auk kyngetu sína.

Geithafrar eru einkennisdýr Þórs. Eftir að kristni sigraði var geithafurinn tengdur djöflinum og á myndum er sá gamli oft með tignarleg hafurshorn.

Hamar er tákn fyrir erfiðisvinnu. Hann var tákn fyrir himinöflin, einkum þrumuna og frjóvgandi regn og leysti af hólmi eldri tákn, t.d. öxi. En hamar varð ógnvekjandi tákn þegar menn fóru að vinna járn. Smiðir hömruðu glóandi járn úr skauti móður jarðar til þess að hjálpa því til þroska. Hefaistos var smiður grískra goða, vanskapaður sonur Seifs, Vulcanus er hliðstæða hans hjá Rómverjum; dvergar og Völundur smiður jafnast á við þá að hagleik. En hamarinn er þó fyrst og fremst tákn Þórs í germanskri goðafræði. Ásatrúarmenn báru sumir hamarsmynd sér til heilla, þannig öðluðust þeir hlutdeild í megni Þórs.

Hamar og sigð urðu tákn Sovétríkjanna, hamar sem tákn fyrir iðnað og iðjusemi, sigð fyrir landbúnaðinn, en bæði táknin upphaflega tengd frjósemi.

Sovét þýðir ráð, menn áttu að mynda saman ráð og stjórna. Formaður ráðsins í Leníngrad á uppgangstíma bolsévikka (kommúnista) hét Vjateslav Skrjabin. Hann tók upp nafnið Molotov og varð utanríkisráðherra Sovétríkjanna um skeið og átti þátt í að semja við Hitler á sínum tíma. Molotov er dregið af orðinu molot, sem þýðir hamar.

Guðirnir okkar gömlu eftir Sölva Sveinsson