ÍSLE1GR05 – ritun

Hver er ég?

Segðu frá þér sjálfum og því hver þú ert. Meðal þess sem fram á að koma eru upplýsingar um nafn og aldur, hvar grunnskólanám fór fram, á hvaða braut þú ert og hvers vegna, einnig hvers vegna FÁ var valinn.

Segðu frá helstu persónueinkennum þínum, fjölskyldu, áhugamáli, framtíðarmarkmiði og hvaða (sumar)vinna hefur verið unnin svo eitthvað sé nefnt af því sem til greina kemur. En notaðu einnig eigið ímyndunarafl!

Hafðu textann persónulegan en gættu þess að óþarfi er að veita of miklar upplýsingar um sig sjálfa(n).

Lengd um ein blaðsíða. Efnisgreinar eiga að vera 5 – 6.

Gættu vel að því að falla ekki í málsnið spjallrása. Þessi texti er formlegur og þá á að vanda málfar eins og frekast er unnt.

Þetta verkefni er til að sjá

· hvaða vald þú hefur á íslensku máli

· að ganga frá texta í tölvunni þannig að ákveðinni uppsetningu sé fylgt

Mundu

Í rituninni vinnum við út frá efnisgreinum. Efnisgrein er það sem er milli greinaskila. Ný efnisgrein byrjar þegar ný hugsun eða ný áhersla er í textanum. Fjallað er um efnisgreinar í Handbók um ritun og frágang.

Gættu vel að því að setja greinaskil rétt. Þar er um að ræða tvær leiðir. Önnur er eins og hér er gert og er algeng í tölvuvinnslu, ein auð lína og ekki inndregið. Hin er að hafa ekki auða línu og inndregið og það er algengast í bókum og blöðum.

© Íslenskudeild FÁ