Fjölbrautaskólinn við Ármúla
Erfiðasta hindrunin sem fólk með dyslexíu þarf að yfirstíga er stafsetning og frágangur ritverka. Það tekur margan einstaklinginn mikinn tíma og orku að setja nokkur orð á blað svo vel fari. Þegar orðin eru loks komin á blaðið er hugmyndin fokin út í veður og vind og þess vegna kann textinn að virðast barnalegur. Hvað er til ráða?
Því miður er ekki til nein töfralausn en gott ráð getur verið að kaupa sér lítið upptökutæki og lesa textann fyrst inn á snældu. Þá er hægt að gefa hugmyndafluginu lausan tauminn og þegar textinn er skrifaður þarf viðkomandi ekki að hugsa mikið um efnislega þáttinn.
Mikilvægt er að átta sig á því að allir sem fást við ritun þurfa að vinna í þrepum. Þrepin eru:
- ákveða efnið (oftast í samráði við kennara)
- ræða um efnið við alla sem nenna að hlusta og gefa góð ráð
- skrifa niður lykilorð fyrir hvern efnisþátt eða kafla (búa til hugkort)
- gera uppkast (annaðhvort skriflega eða munnlega inn á segulband)
- lesa yfir uppkastið og bera það undir einhvern sem er tilbúinn að veita uppbyggilega gagnrýni
- skrifa textann í ritvinnslu (word)
- endurskoða inngangs- og lokaorð
- lesa vel yfir textann þegar innslætti er lokið og nota leiðréttingarforrit (púkann) ef það er í tölvunni.
- muna eftir forsíðu og setja efnið í snyrtilega möppu :)
Greinar fyrir kennara um ritun sem birst hafa í tímariti móðurmálskennara, Skímu.
Sumir skrifa í öskuna... Tilgangur og markmið ritunar
Sú rödd var svo fögur... Um rödd og raddleysi í skólaritgerðum nemenda