Upplýsingar um lestur:

Það léttir líf hvers manns að kunna að lesa svo ekki sé talað um að geta lesið hratt. Á tækni- og tölvuöld eru auðvitað til ýmis hjálpartæki sem auðvelda mönnum lestur, svo sem eins og snældur, geisladiskar og hljóðgervlar, en það er alltaf töluverð fyrirhöfn að nýta sér tæknina þótt góð sé. Þess vegna er mikilvægt að gefast ekki upp þótt móti blási. Reynslan hefur sýnt að margir, sem átt hafa við verulega lestrarörðugleika að stríða, hafa sigrast á erfiðleikunum að einhverju eða jafnvel öllu leyti. Gott dæmi um það er sænska konan Margareta Strömbom en glefsur úr ævisögu hennar er að finna hér á netinu. Hún segir m.a.:

Ég er eiginlega lesblind eða með dyslexíu en ég hugsa sjaldan um það nú orðið. Ég hef náð tökum á dyslexíunni og þess vegna hindrar hún mig ekki lengur í daglega lífinu. (Strömbom,1999, bls.9)

Sífellt er verið að rannsaka lestur og orsakir lestrarörðugleika en síðustu áratugi hafa augu manna opnast fyrir því að erfiðleikar fólks við að tileinka sér lestur og réttritun eru óháðir greind. Rannsóknir sýna að samband er á milli hljóðkerfisvitundar, það er að segja hæfileikans að skilja, vinna með og greina í sundur minnstu hljóðeiningar málsins, og lestrar - og sýnt hefur verið fram á að hægt er að þjálfa hljóðkerfisvitund til þess að efla lestrarnám. Þeir sem vilja kynna sér þetta frekar geta t.d. lesið greinar í tímaritinu Glæður en það er fagtímarit Félags íslenskra sérkennara. Undanfarinn áratug hafa þar birst margar góðar greinar um dyslexíu. Góðar upplýsingar um læsi á íslensku má einnig finna víðar, t.d. í ritinu Fluglæsi eftir Rósu Eggertsdóttur.

Þegar nemendur eru komnir í framhaldsskóla skiptir lestrarhraði og námstækni miklu máli. Þá er gott að kynna sér leiðir til að bæta árangur sinn. Guðbjörg Ragnarsdóttir hefur skrifað góða grein sem hún kallar „Námstækni og hraðlestur“ (Skíma. 1. tbl.25.árg. 2002, bls. 22) og eru hér lykilatriði í greininni.

Fjölnir Ásbjörnsson og Guðni Kolbeinsson hafa gefið út tvær bækur um hraðlestur ásamt verkefnabókum: Lestu betur og Lestu nú. Þeir birta í fyrrnefndu bókinni athyglisverð atriði eftir Norman Lewis (How to Read Better and Faster) til íhugunar varðandi lestur en makrmið lestrarþjálfunar er að ná að tileinka sér þá lestrartækni sem felst í hægra dálkinum. Gott er að setja sér raunhæf markmið og gefa sér tíma til að vinna að einu atriði í senn.