Vikuskammtur

8. nóvember 2004

ADSL tengingar

Skólinn gerði samning við Skýrr og Landssímann um ADSL-tengingu starfsmanna við staðarnet skólans og Internetið í gegnum FS-netið (net framhaldsskóla). Skólinn leigir 10 Mb/s BBRAS-tengingu hjá Landssíma og rekur eigin radíusþjón. Nú þegar hafa u.þ.b. 70 starfsmenn nýtt sér þetta tilboð og eru sítengdir Netinu að heiman. Með þessu hafa starfsmenn aðgang að öllum netdrifum skólans að heiman svo og prenturum auk þess sem þeir eru tengdir Interneti. (Tek það fram í ljósi umræðna um ritstuld að svo tæknilegar upplýsingar eru allar úr ranni netstjóra).

Erlend heimsókn

Kirsi Needelman frá Vantaa vocational institute, social and health care department, í Finnlandi heimsótti skólann í vikunni sem var. Hún fékk styrk frá Nordplus til þess að koma og skóða skólann.

Merkilegar upplýsingar úr fjarnámspúllíunni

Í fjarnáminu hjá okkur núna á haustönn 2004 eru tæplega 170 grunnskólanemendur í um 200 áföngum. Alls eru 14 grunnskólar með sína nemendur í námi hjá okkur. Þetta var í pistli frá Sigurlaugu á dögunum og ég spái því að þessum nemendum fjölgi enn næsta haust.

Doktorsnám

Ásrún Matthíasdóttir sem við þekkjum öll bað um leyfi til þess að mega ræða við stjórnendur, kennara og nemendur um upplýsingatæknistudda kennslu, fjarnám og fleira í tengslum við doktorsnám sitt. Ég samþykkti það og vænti þess að kennarar taki henni vel þegar þar að kemur.

Fjarnámsskráning

Skráning í fjarnám á vorönn 2005 hefst 7. janúar og stendur til miðnættis 17. janúar.  Enn eiga nokkrar deildir eftir að senda fjarnámsstjóra skrá um áfanga í boði, en brýnt er að koma þeim upplýsingum út á netið nú þegar til þess að fækka símtölum og skeytasendingum.

Föstudagur 12. nóvember

Deildafundir eru boðaðir kl. 13.00 á föstudaginn.

Íslenskuskólinn

Brátt verður undirritaður samningur á milli Framvegis, Íslenskuskólans og menntamálaráðuneytisins um samstarf þeirra fyrrnefndu um starfsemi Íslenskuskólans. Skólinn býður grunnskólabörnum sem eru búsett erlendis upp á íslenskukennslu á netinu. Hönnuðir hans og kennarar eru þau Árni Björgvinsson, Gígja Svavarssdóttir og Þorbjörg Þorsteinsdóttir. Framvegis mun halda utan um starfsemina til að byrja með, en koma smá saman inn í faglegt starf skólans. Á vef Íslenskuskólans eru aldursflokkaðir vefir, einstök námskeið, umræðuþræðir, leikir, lestrarátak og margt fleira. Sjáið þennan frábæra skóla: http://islenskuskolinn.is/. Að því er stefnt að bæta við fleiri greinum.

Samstarfsnefndarfundur framhaldsskólastigsins

Þessi fundur verður haldinn fimmtudag og föstudag. Hann sitja skólameistarar, ráðuneytismenn og ráðherra. Aðalmál fundarins núna er stytting names til stúdentsprófs, viðbótarnámið og tregða háskólans, fjáraukalagafrumvarp fyrir árið 2004 (skiptir okkur miklu vegna fjölgunar nemenda), innritun í skólana á næsta ári, kjarasamningar og fleira.

Bretlandsheimsókn 3.-7. nóvember

Mér fannst gaman og fróðlegt að heimsækja Witchford village College sem er í samnefndu þorpi í grennd Cambridge. Þar eru 900 nemendur á aldrinum 11-18 ára í secondary school eins og það heitir sem leggur sérstaka áherslu á íþróttir, enda tveir leikfimisalir í húsinu, íþróttavellir allt um kring. Allir nemendur fá heitan mat í hádeginu. Þeir ganga í skólabúningum sem eru gráleitar buxur, blá peysa með merki skólans fyrir 11-14, en rauð peysa fyrir 15-18. Stjórn nemendafélagsins má hins vegar klæðast eigin fötum; þannig er hún auðþekkt frá hinum. Allir eiga að vera í svörtum skóm, íþróttaskór óleyfilegir. Liti menn hár sitt tveimur litum skulu þeir dveljast heima uns annar er vaxinn úr! Skólastjórinn fer aldrei inn á kennarastofu nema hann sé sérstaklega boðinn þangað. Skólinn var hreinlegur og notalegur andi sveif yfir vötnum.

Í samræmi við verkefnið hefur WvC breytt ýmsu í kennsluháttum sínum. Allir nemendur eru t.d. prófaðir sérstaklega í samræmi við kenningar Gardners og reynt er að meta hvernig þeir læra, hvort sjónfærni, heyrn eða hreyfitengt nám henti þeim best. Kennarar fá niðurstöður í hendur. Nýlega breyttu þeir töflugerð og kennslu á þann veg að hver nemandi er einungis í þremur greinum á dag, auk íþrótta, 100 mínútur í senn. Í hverri lotu á að kenna þannig að höfði til áðurnefndra þriggja greindarsviða.

Kristen og Dóra hafa unnið mjög gott starf í þessu samhengi og meðal annars sett upp vef fyrir verkefnið í samvinnu við Ólaf Þórisson. Þær opna hann öðrum nú innan tíðar.

Mér fannst gaman að koma til Cambridge og ganga þar um götur og skoða gamla stúdentagarða og suma heimsfræga, svo sem eins og King´s College og Trinity College. Þar var nýlega plantað eplatré við innganginn í minningu Newtons sem reyndar fékk eplið í hausinn þegar hann var heima í fríi! En núverandi tré þar á flötinni mun einmitt vera afkomandi þess ágæta trés sem þyngdaraflið neyddi til þess að vekja Ísak af værum blundi.

Samstarfsskólarnir frá Englandi, Ítalíu og Portúgal verða gestir okkar um miðjan apríl næstkomandi.

Sölvi Sveinsson