Vikuskammtur

2. apríl 2004

Norðmenn og Danir í heimsókn

Síðastliðinn miðvikudag komu í heimsókn Norðmenn, nemendur úr framhaldsskóla og kennarar þeirra. Þau fóru inn í tima hjá Margréti sögukennara og töluðu við nemendur um sameiginlegar sögulegar rætur. Eftir það kynnti Stine fyrir þeim skólann og skólakerfið okkar.

Á þriðjudaginn komu svo þrír Danir og einn Íslendingur til að auglýsa nám í Danmörku við Facit Erhvervsakadami í Horsens og Vejle. Þau kynntu fyrir nemendum okkar (DAN 403) kerfisfræði- og matvælafræðisnám.

Nýr tengiliður

Skólinn hefur fengið nýjan tengilið í ráðuneyti, Ernu Árnadóttur. Við snúum okkur til hennar með margvísleg erindi sem að skólanum lúta og samskiptum hans við ráðuneytisfólk. Ég geri ráð fyrir að margir þekki hana, að minnsta kosti móðurmálskennararnir.

Gullkorn vikunnar

Í dagbókinni minni er klausa við hvern mánudag og síðastliðinn mánudag var þetta haft eftir Margréti Thatcher: “Ég skil ekki þessar kvartanir út af námslánunum. Carol dóttir okkar lagði fyrir af sínum. Auðvitað borguðum við skíðafríin hennar.” Svo þá er spurningin hvort breskir stúdentar fari yfirleitt í skíðafrí?

Bygginganefnd

Væntanlega munu arkitektar leggja hugmyndir fyrir ráðuneytið nú eftir helgi og í kjölfarið fáum við væntanlega glaðninginn. Ég mun senda bygginganefnd skýrsluna um leið og hún berst mér í hendur.

Skólasamningur

Við Ólafur munum hitta ráðuneytismenn á mánudaginn til skrafs um skólasamning. Höfuðviðfangsefnið er að fá ársnemendatölu upp á 950, en annars eru ýmis mál til umræðu, svo sem félagsliðabraut, nýbúar og starfsdeild við Safamýri.

Samstarfsnefndarfundur

Vorfundur samstarfsnefndar framhaldsskólastigsins var haldinn í gær, en hann sitja allir skólameistarar, ráðuneytisfólk og ráðherra ávarpar fundarmenn og svarar fyrirspurnum. Þetta var ágætur fundur og ýmislegt kom þar fram. Skipulagi ráðuneytis hefur verið breytt þannig að framhaldsskóla- og fullorðinsfræðsludeild, grunnskóla- og leikskóladeild hafa verið sameinaðar í einni skóla- og símenntunardeild. Karl Kristjánsson er deildarstjóri.

Eftir þennan fund er ég sannfærður um að nám til stúdentsprófs verður stytt. Sá andi sveif yfir vötnum. Mesta vinnan er í undirbúningshóp um námskrá og gæðamál, en sá hópur hefur hist 29 sinnum. Skólaárið verður vafalaust lengt, jafnvel upp í 190 daga. Tilteknir námsþættir verða fluttir í grunnskóla sem fær nýja námskrá, en námskrá framhaldsskóla verður endurrituð með hliðsjón af því og lengra skólaári. Þetta leiðir til þess að námskrár starfsmenntabrauta verða endursamdar. Spurning er hvort litlir grunnskólar ráða við að kenna efni sem nú er í framhaldsskóla og jafnframt vaknar spurning um hvort ekki þurfi að efla og breyta kennaramenntun.

Innan tíðar verða allir áfangar í námskrá aðgengilegir á heimasíðu ráðuneytis á ensku og dönsku.

Til framhaldsskóla renna árlega um 10 milljarðar. Á síðasta ári nam hallarekstur 70 milljónum sem er lítið hlutfall af svo stórri upphæð. Uppsafnaður vandi skólanna er nú 580 milljónir.

Almennur hluti námskrárinnar hefur nú verið endurskoðaður og er á netinu. Henni verður dreift í skólanum innan tíðar.

Innritun í skólana lýkur föstudaginn 11. júní, svo ætla má að kennsluskipting liggi ekki fyrir fyrr en undir júnílok.

Snemmbúið sumarfrí

Undirritaður fer á fund í norrænni málnefnd miðvikudaginn 14. apríl og í framhaldi af því í snemmbært sumarfrí nokkra daga. Verð aftur á vettvangi dagsins miðvikudaginn 21. apríl.

Gleðilega páska!

Sölvi Sveinsson