Vikuskammtur
27. september 2004
Leonardoverkefni tilnefnt til verðlauna
Leonardoverkefni
sjúkraliðadeildar þar sem sjúkraliðar okkar fóru í starfsþjálfun til Danmerkur
hefur nú verið tilnefnt ásamt nokkrum öðrum verkefnum til sérstakra verðlauna.
Stefnumótunarvinna
Ég sá ekki betur
en menn ynnu kappsamlega í hópunum síðastliðinn föstudag. Vinnunni verður fram
haldið á föstudaginn kemur. Hafi einhver hópur lokið sínu starfi eru menn
velkomnir í aðra hópa.
Námskeið í skyndihjálp
Á vikulegum fundi
skólayfirvalda og kennslustjóra Heilbrigðisskólans kom fram að nauðsynlegt væri
fyrir kennara að fá fræðslu í skyndihjálp. Reynslan hefur sýnt að fái nemandi
t.d. flog í skólanum verða viðbrögðin yfirleitt fátkennd
og ómarkviss. Því hefur verið ákveðið að bjóða starfsmönnum upp á 6
kennslustunda námskeið í skyndihjálp sem verður haldið kl. 13.00-17.00
föstudaginn 5. nóvember ef næg þátttaka fæst. Verði þátttakendur fleiri en 20
verður leiðbeinendum Rauða krossins fjölgað. Kennarafundi þennan dag yrði þá
frestað. Hverjir hafa hug á að taka þátt í slíku námskeiði? Vinsamlega sendið
mér þátttökutilkynningu.
Ungir vísindamenn á Írlandi – og Ólafur líka!
Hrafn Þórisson
nemandi og ungur vísindamaður hélt til Dyflinnar
síðastliðinn föstudag með gervi-greindar-kvikindi sín
á tölvutæku formi. Ólafur H. fór síðan á laugardaginn, en hann fer í boði
Rannsóknaþjónustu háskólans. Vonandi gengur þeim allt í haginn!
Norsk heimsókn
Þriðjudaginn 21/9 tók Stine ráðherra norrænna mála á móti 13 Norðmönnum, kennarum frá Ringsaker Videregående Skole (http://www.ringsaker.vgs.no/main.htm)
Þeir höfðu serstakan áhuga á að fræðast um Heilbrigðisskólann og fjarnámið. Það fer kannski að verða útflutningsvara, ef nám getur á annað borð verið vara?
Danmerkurferð lyfjatækna og lyfjatækninema
Þann 16.sept. fór 19 manna hópur lyfjatækna, lyfjatækninema og kennara í þriggja daga skólaferðalag (vísindaferð) til Danmerkur. Voru þetta 6 útskrifaðir lyfjatæknar (síðan vorið 2004), 3 sem útskrifast jólin 2004, 8 sem útskrifast á næsta ári og 2 kennarar við brautina. Farið var í heimsókn í lyfjatækniskólann Pharmakon sem staðsettur er í Hillerød í úthverfi Kaupmannahafnar. Móttökur í skólanum voru hreint út sagt frábærar. Eftir að hafa fengið greinargóða kynningu á námskrá skólans og annarri starfsemi hans, skoðuðum við húsakynni skólans (þ.á.m. fullbúið kennsluapótek!). Að lokum var okkur svo boðið til glæsilegs hádegisverðar (eins og á 5 stjörnu hóteli). Nemendur vildu margir hverjir verða eftir í skólanum... Fyrirhugað var að skoða stórt apótek á Kaupmannahafnarsvæðinu, en á síðustu stundu fengum við að frétta að ekki yrði hægt að taka á móti okkur sökum manneklu í apótekinu. Hins vegar fórum við í minni hópum í vettvangsferðir í nokkur apótek í Kaupmannahöfn þar sem við skoðuðum úrval lausasölulyfja, uppstillingar o.fl. Reyndar fannst okkur ótrúlegt hvað lítið var um apótek í miðbænum. Fyrir utan þessar heimsóknir, stikuðum við Strikið, skruppum í tívolí, fórum saman út að borða og skoðuðum mannlífið.
Damien Rice
Ólyginn sagði mér og ég trúði að umræddur maður væri heimsþekktur tónlistarmaður. Hann skemmti hér síðastliðinn fimmtudag og tókst vel; nemendur voru kátir. Listamaðurinn tók ekkert fyrir sinn snúð, en krafðist þess að nemendur létu ákveðna upphæð renna til góðgerðarmála.
Umhverfisstefna
Unnið er að því
að semja skólanum umhverfisstefnu og á Heiða Björk heiðurinn að því. Víða eru
nú kassar fyrir gæðapappír og tunnur fyrir glanspappír. Fleira er á döfinni og
verður kynnt síðar, en þetta er löngu tímabært átak sem öllum ber að fylgja
eftir.
Tilhliðranir í stundaskrá
Stundaskrárgerð
er sífellt til umræðu. Á fundi samstarfsnefndar hefur málið borið á góma. Í
framhaldi af því vil ég árétta að starfsmanni í fullu starfi er óheimilt að
ráða sig til starfa annars staðar í hlutastarf nema með leyfi skólameistara.
Ekki er hægt að verða við töfluóskum vegna slíkra tilvika. Hins vegar er
eðlilegt að koma til móts við tímabundin vandamál, t.d. vegna smábarna,
veikinda o.s.frv.
Gagnvirk tafla
Loksins, loksins.
Skólinn er búinn að eignast töflu sem kennir sjálf. Hún er kölluð gagnvirk af
þeim sökum og er í stofu M35. Jóna mun tilraunakenna á þessa töflu og sýna
síðan okkur hinum hvernig apparatið virkar. Reynslan af töflunni verður síðan
metin með það í huga hvort borgi sig að kaupa fleiri.
Raungreinastofur
Þýsku
innréttingarnar eru komar til landsins og verða settar upp núna í vikunni undir
stjórn manns sem kemur frá verksmiðjunni. Á meðan fer kennsla fram í Síðumúla
1.
ADSL tengingar
Nú þegar hafa 50 starfsmenn
skráð sig hjá netstjóra fyrir ADSL tengingum. Hinir fyrstu verða tengdir 1.
október, en þá tekur samningurinn við Símann gildi.
|
|
|
||||||||||||||||
Sölvi Sveinsson