Vikuskammtur

25. október 2004

Umhverfismál

Eins og þið hafið væntanlega tekið eftir er verið að innleiða ýmsar umbætur í umhverfismálum skólans þessa mánuðina. Búið er að setja flokkunarkassa fyrir endurvinnslu á gæðapappír inn á öll vinnuherbergi kennara og á skrifstofur. Einnig hefur grænni tunnu verið komið fyrir í matsal nemenda fyrir endurvinnslu tímarita og dagblaða. Ræstingafólk sér um að tæma flokkunarkassana út í gám sem er staðsettur fyrir vestan skólann. Gámakó ehf sér um að tæma þann gám og grænu tunnuna í matsal. Þessi flokkun á tímaritum, dagblöðum og gæðapappír sparar skólanum einhverjar þúsundir á ári því skólinn borgar minna fyrir flokkaðan úrgang en óflokkkaðan. Ætlunin er að taka fleiri rekstrarþætti skólans til endurskoðunar með það sama í huga sem er aukin hagkvæmni í rekstri og um leið tekur skólinn aukna ábyrgð í umhverfismálum.

Bólusetning

Í dag eru síðustu forvöð að láta bólusetja sig gegn flensu. Guðbjörg verður með sprautuna á lofti í hádeginu.

Kennarafundur

Næstkomandi föstudag verður haldinn kennarafundur kl. 13.00. Dagskrá: 1) Rafrænir miðlar á safni og víðar. Kristín Björgvins hefur framsögu. 2) Framsaga vinnuhópa um faglega umræðu, mötuneytismál og vinnuaðstöðu kennara. 3) Önnur mál. Að fundi loknum mun Kristján kenna þeim sem læra vilja betur á Innu.

Könnun á námi og kennslu

Stýrihópur um sjálfsmat hélt fund í vikunni sem leið um næstu skref í sjálfsmati, en það er að tilraunakeyra ákveðnar spurningar og munu nemendur hjá kennurum í stýrihópnum svara þeim. Síðan verður forritið fínpússað fyrir vorið og þá verða væntanlega valdar nokkrar deildir til að ríða á vaðið.

100 ára afmæli rafvæðingar

Þess er minnst um þessar mundir að 100 ár eru liðin frá því rafvæðing hófst að nokkru marki. Nemendur í EÐL 103 fara af því tilefni á sýningu og athöfn í Smáralind næstkomandi föstudag kl. 10.30 undir stjórn Kristjáns Þórs.

Fundur með BSRB

Senn skýrast þessi mál, en allt stefnir í það að umtalsverð aukning verði á kennslu í ensku, dönsku og spænsku.

Fundur um rekstur íslenskuskólans

Þrír kennarar sem settu upp íslenskuvefinn sóttu um að reka þennan skóla. Ráðuneytið vill hins vegar að þeir eigi samstarf við fræðslusetur og Framvegis varð fyrir valinu. Kennararnir eru nú að hugsa sinn gang og næsti fundur er boðaður núna á miðvikudaginn.

Fartölvuvagnar og skjávarpar

Fartölvuvagnarnir tveir eru tilbúnir og eru 10 fartölvur í hvorum vagni.

Eru þeir staðsettir í stofunum M26 og M36 en má nota vagnana í öllum kennslustofum á hvorri hæð í miðálmunni. Lykillinn og bókunarlistinn eru í vinnuherbergjum M20 og M30 og þarf að skila lyklinum þangað að kennslustundinni lokinni. Leiðbeiningar um notkun og frágang fartölvanna eru innan á hurðinni í fartölvuvögnunum. Gerið ávallt ráð fyrir þann tíma sem það tekur að koma tölvunum í gang og ganga frá þeim við skipulagningu kennslunnar.

Allir skjávarpar í miðálmunni eru núna tengdir.

Eru skjávarpar fastir í lofti núna í öllum kennslustofum í miðálmunni og auk þess í stofunum A11, A13, A14, A23, A25, V13, V24 og V25.

Auk þess eru skjávarpar á borðum:

1 skjávarpi í kompunni við hliðinni á V23

2 skjávarpar í V16

1 skjávarpi í A16

1 skjávarpi í A26

1 skjávarpi í A27

1 skjávarpi í Síðumúla 6 (Framvegis)

Farið varlega með snúrurnar til að tengja skjávarpa við tölvu og gangið snýrtilega frá snúrunum að kennslunni lokinni.

Undanþágunefnd

Á heimasíðu menntamálaráðuneytisins er fróðleg skýrsla um undanþágur og undanþágubeiðnir. Hvoru tveggju hefur fækkað undanfarin ár og í sumum skólum er enginn á undanþágu (t.d. Kvennó). Hér eru um 5 stöðugildi á undanþágu.

Og svona fór það

Ég sótti um stöðu skólastjóra Versló. Mér var síðan boðin staðan síðastliðinn laugardag. Ég mun því innan tíðar hverfa til þeirra starfa. Þessa ákvörðun langar mig til að ræða við samstarfsmenn í hádegishléinu.

Sölvi Sveinsson