Vikuskammtur

23. ágúst 2004

Töfluafhending

Töflur voru afhentar 19.-20. ágúst og satt best að segja er með ólíkindum hvað margir nemendur sækja um töflubreytingar þótt þeir hafi fengið inn í töflu það sem þeir völdu! Í morgun var þeim hent út úr Innu sem ekki höfðu sótt töflur og á morgun verða teknir inn nemendur af biðlista í þá hópa sem pláss er í.

Brú fyrir hjúkrunar- og móttökuritara

Nám fyrir hjúkrunar- og móttökuritara er nýtt af nálinni. Í slíkum tilvikum hefur reglan verið sú að starfandi fólki í greininni er gefinn kostur á að fá réttindi með námi sem byggist á áföngum brautarinnar. Þetta heitir brúarsmíði. Hér verða 25-30 manns í brúarnámi í haust, en það er kennt seinnipart dags þrjá daga í viku.

Stofur V12 og V12a

Þessar stofur eru í nýja húsinu en verða naumast tilbúnar fyrr en undir helgi.

Íslenskuskólinn

Ég hef frétt að þrír hafi sótt um rekstur Íslenskuskólans, en ég veit ekki hverjir hinir tveir eru. Við verðum kölluð til viðræðna innan tíðar.

Föstudagur 27. ágúst og 3. september

Kennarafundur er boðaður kl. 13.00 báða þessa daga. Á dagskrá er að greina geðræn frávik meðal nemenda og m.a. fjallað um átröskun, sjálfsvígshegðun, þunglyndi, kvíða, svefntruflanir og fíkninefnaneyslu.

Bréf til forráðamanna

Eftirfarandi bréf verður póstlagt næstkomandi föstudag:

Til foreldra og forráðamanna

Eins og þú veist hófst kennsla mánudaginn 23. ágúst síðastliðinn og skólastarf fór vel af stað þótt þröngt sé setinn bekkurinn.

Barnið þitt er í sérstökum stærðfræðiáfanga sem heitir STÆ 193. Námsefnið er sérstaklega skipulagt fyrir þá nemendur sem ekki spjöruðu sig nógu vel á samræmdu prófi eða fengu lága skólaeinkunn í greininni. Þetta er áfangi sem tilheyrir almennri braut og nemendur verða að standa sig til þess að geta hafið nám í þeirri stærðfræði sem tilheyrir námsbrautum framhaldsskóla.

Því legg ég ríka áherslu á að foreldrar og forráðamenn haldi börnum sínum við efnið og ég vil taka fram að léleg mæting getur kostað barnið skólavist. Jafnframt vil ég taka fram í upphafi að enginn getur sagt sig úr STÆ 193 nema að hætta í skólanum um leið.

Reynslan hefur kennt okkur að nái nemendur ekki tökum á stærðfræði í upphafi náms þá getur honum reynst erfitt að ljúka því námi sem þeir stefna að.

Með ósk um gott samstarf,

Sölvi Sveinsson

skólameistari

Könnun

Minni enn á könnun Hákonar til undirbúnings fundinum sem haldinn verður mánudaginn 30. ágúst kl. 11.40. Skilið henni til SSv, OHS eða Heiðu á skrifstofunni. Kennsla verður felld niður á mánudaginn milli 11.40 og 13.10.

Bílastæði

Fyrirtækið Urð og grjót mun væntanlega hefjast handa í kvöld að stækka bílastæðið og verður bætt við 70 stæðum hið minnsta.

Frí

Undirritaður fer í síðbúið sumarleyfi föstudaginn 27. ágúst og kemur aftur til starfa miðvikudaginn 8. september.

Sölvi Sveinsson