Vikuskammtur

20. september 2004

Kennaranemar

Kennaranemarnir frá HÍ mæta hér á sinn fyrsta fund á þriðjudaginn. 21.september kl. 9:30. Best væri að þeir leiðsagnarkennarar sem búið er að tala við verði á kennarastofunni kl.10:35 og hitti sitt fólk.

Þórsmerkurferð

150 nemendur og kennarar fóru í lífsleikniferð í Þórsmörk síðastliðinn fimmtudag þótt ekki væri veður blítt og þök hefðu fokið af húsum undir Eyjafjöllum og í Öræfum. En skemmst frá að segja: sólin skein og allir voru kátir og lærðu mikið! Nokkur agamál komu upp en leystust farsællega að mestu.

Fundir á föstudag

Næstkomandi föstudag hittast starfsmenn í 11 hópum og ræða stefnumótunarmál. Jóna mun nú í vikunni senda skilaboð um hópstjóra og hverjir eru á hverjum stað.

Brunaæfing

Foreldrar spurðust fyrir um brunaæfingar á fundi á dögunum. Verið er að undirbúa slíka æfingu og verður hún haldin í október.

ADSL-tengingar

Gengið verður frá málinu á samstarfsnefndarfundi á morgun og í framhaldi af því mun netstjóri afhenda mönnum sérstakt eyðublað sem útfylla þarf til þess að fá tenginguna.

Tímaskyn

Ingunn frönskukennari sagði við nemendur sína á dögunum að hún ætlaði að sýna þeim bút úr kvikmynd “sem ég sá þegar ég var í menntaskóla” sagði hún. “Oooooo,” sagði þá einn nemandinn, “ég þoli ekki myndir í svart/hvítu.”

Sölvi Sveinsson