Vikuskammtur

1. nóvember 2004

Námsáætlanir

Það er kannski gamaldags, en mér finnst samt nauðsynlegt að kennsluáætlanir liggi frammi á skrifstofu útprentaðar. Þeir sem eiga eftir að skila eru vinsamlega beðnir að láta Fjólu hafa útprentun.

Afleysingamaður

Það er verið að lagfæra hnéð á henni Daniele. Gunnar Geir Pétursson kennir fyrir hana að hluta til og verður því viðloðandi kennarastofuna hjá okkur þessa viku að minnsta kosti.

Skyndihjálparnámskeið

Námskeið í skyndihjálp fyrir starfsmenn verður föstudaginn 5. nóvember kl. 13-17.00 í stofu A11. 18 manns eru bókaðir, en ef einhver vill bætast í hópinn þá er það möguleiki í dag.

Kína

Ólafur H. Sigurjónsson fór til Kína í gærmorgun með vetnisstelpunum. Hann er væntanlega lentur í Sjanghæ núna – nema öryggiseftirlitið hafi hremmt þau með dularfullan búnað í handfarangri. Í Kína er það ferðamannsskylda að fara á veitingahús sem bjóða upp á mismunandi rétti úr hundakjöti. Ég bíð spenntur eftir að heyra hversu vel það bragðast.

Eyðsla

Nú er eiginlega komið að þeim tímapunkti að ekki verður ráðist í frekari fjárfestingar eða eyðslu. Hins vegar geta einstakar deildir farið að hugsa um framtíðina og skilað til Eddu fjármálastjóra tillögum sínum til fjárhagsáætlunar næsta árs.

Heimsókn frá Kalix

Hingað komu sænskir gestir fyrir helgina, frá Mediegymnasiet í Kalix í Norður-Svíþjóð en Björg Árnadóttir nam einmitt í þeim skóla og tók á móti gestunum ásamt Stine, Sigurlaugu fjarnámsstjóra o.fl.

Gíróseðlar

Nemendur okkar hafa nú fengið gíróseðla senda heim vegna vorannar. Ég bið ykkur að ítreka við nemendur að þeir greiði seðlana á réttum tíma. Seðlunum verður lokað þegar eindagi þeirra er liðinn og aðrir teknir inn í staðinn.

Fjarvera

Undirritaður verður á Englandi 3.-7. nóv. í Comeniusarerindum. Kristján Thorlacius er munstraður meistari á meðan.

Starfslok

Undirritaður fer að fullu til nýrra starfa 1. janúar. Ég mun þó verða talsvert þar í efra fram að jólum. Ég tel víst að staða mín verði auglýst laus til umsóknar á næstu dögum. Ég ætla að tala við nemendur þegar auglýsingin verður birt.

Sölvi Sveinsson