Vikuskammtur
Fjarvistir
Í kvöld verða fjarvistir keyrðar inn á
ferilinn. Því er brýnt að færslu þeirra verði lokið í dag.
Prófatörnin
byrjuð
Vigfús stillti upp í salnum og stýrði vöskum
piltum sem báru borð og stóla. Við réðumst í stólakaup að þessu sinni og
keyptum 60 nýja stóla sem hægt verður að stilla upp í salnum þegar það hentar.
Fjarnám
um víða veröld
Rúmlega 800 manns gangast undir fjarnámspróf
að þessu sinni og er prófað á 46 stöðum hér heima og erlendis. Nemendur koma í
próf í sendiráðinu í Osló og Stokkhólmi, á þremur stöðum í Danmörku, tveimur
þýskum borgum, í Lundúnum, Sviss svo nokkuð sé talið og sá sem fjærst situr í
prófi að þessu sinni er flugfreyjan hjá Atlanta sem mætir í próf í Teheran
austur í Persíu.
500
manns á námskeiðum hjá Framvegis
Þátttaka hefur ekki í annan tíma verið meiri í símenntuninni og veltan í ár mun fara yfir 30 milljónir. Það þýðir að starfsemin stendur undir sér þótt ráðist hafi verið í allmiklar framkvæmdir og innkaup vegna flutninga. Það er ánægjulegt. Nú er verið að finna fólk í sérstakt fagráð sem mun vera starfsmönnum til halds og trausts.
Fundur
verkstjóra á föstudaginn
Ég held að sú umræða sem við hófum á fundinum
sé þarfleg og þurfi raunar sífellt að eiga sér stað. Eftir því sem fleiri bjóða
upp á fjarnám þurfum við að rýna meira í eigin barm og bæta það sem bæta þarf
og laga áfangaframboðið að eftirspurninni. Ef við þurfum að hafa tvista og
þrista til þess þá gerum við það, annars ekki.
Aðalfundur
Menntar síðastliðinn þriðjudag
Ment er samstarfsvettvangur atvinnulífs og skóla og sýnist mér þó að heldur halli á skólana því að þeir eru í minnihluta aðildarfélaga. Mennt sinnir margvíslegum verkefnum, við þekkjum t.d. viku símenntunar og UT ráðstefnurnar, sem eru einungis hluti starfsemi Menntar. Samtökin hafa rekið vefinn mennt.is, en þar er ítarleg skrá yfir allt námsframboð í landinu, - eða næstum því allt. Nú standa yfir samningaviðræður Menntar og ráðuneytis um að þessi vefur verði hluti af menntagatt.is. Mennt sér einnig um CEDEFOP, sem eru starfsheimsóknir þeirra sem sinna fræðslu í verkmenntum og Menntarfólk aðstoðar umsækjendur um Leonardostyrki. Á www.mennt.net, heimasíðu Menntar, er margvíslegar fréttir og upplýsingar að sækja og þar geta menn gerst áskrifendur að rafrænu fréttabréfi samtakanna. Heimasíðan er uppfærð nokkuð oft og þar eru t.d. kynntir umsóknarfrestir um ýmsa styrki.
Félagsliðar
Á aðalfundi Menntar hitti ég gamlan
(skák)kunningja sem nú stýrir símenntunarmiðstöðinni á Ísafirði. Hann vildi
óður og uppvægur að við kenndum námsgreinar fyrir félagsliða um fjarfundabúnað
vestur á firði strax eftir jól, því að Ísfirðingar og aðrir vestra hefðu verið
einstaklega ánægðir með námskeið fyrir stuðningsfulltrúa sem var kennt héðan um
fjarfundabúnað á vegum Framvegis. Umsókn um leyfi til þess að bjóða upp á nám
fyrir félagsliða hefur ekki verið afgreidd í ráðuneytinu.
Orlof næsta vetur
Tveir starfsmenn skólans verða í endurmenntunarorlofi næsta vetur, Ragnheiður Bóasdóttir og Steinunn Hafstað. Til hamingju!
Meira
fé til framhaldsskóla
Meirihluti fjárlaganefndar leggur til að fé til framhaldsskóla á fjárlögum næsta árs verði aukið um 600 milljónir. Það ætti að duga til þess að mæta þeim fjölda nemenda sem er í framhaldsskólum og draga eitthvað úr áhrifum þess flata niðurskurðar sem reikniverkið sætir nú, en það er um 4-5%.
Útlínur
vorannar 2004
Töfluafhending: mánudag og þriðjudag 5. og 6. janúar.
Töflubreytingar: sömu daga er hægt að sækja um töflubreygingar kl. 9.00-15.00.
Kennsla hefst: miðvikudag 7. janúar skv. hraðtöflu miðvikudags og fimmtudags.
Árdagar: hefjast á hádegi þriðjudaginn 2. mars, lýkur á hádegi fimmtudaginn 4. mars.
Árshátíð: fimmtudaginn 4. mars.
Stöðumat í áfanga: afhending miðvikudaginn 10. mars
Páskaleyfi: hefst að lokinni kennslu föstudaginn 2. apríl, nemendur koma til starfa aftur miðvikudaginn 14. apríl.
Próf hefjast: mánudaginn 3. maí. Samræmt próf í íslensku kl. 9-12.00.
Prófum lýkur: mánudaginn 17. maí.
Einkunnaafhending og valdagur: miðvikudagur 19. maí kl. 11-13.00
Prófasýning: sama dag kl. 13-14.00.
Brautskráning: föstudaginn 21. maí kl. 13.00.
Dagbókarglefsa
Jú, það er fullveldisdagurinn í dag og ber upp á mánudag og í dagbókinni minni er ávallt klausa fyrir vikuna neðanmáls á mánudegi, að jafnaði þýdd úr bandarísku lexíkoni um álappalega málsmeðferð forseta, að því er ætla má. En pistill dagsins er hafður eftir Dan Quayle sem var staðgengill Bush eldra, muni ég rétt: “Það er ekki mengun sem spillir umhverfinu, heldur eru það óhreinindi í andrúmsloftinu og vatninu sem gera það.” Vistfræði mínus 103?
Úr
gamalli fundargerð
Skólastjórn FÁ hélt fund 1. apríl 1987, að nýloknu verkfalli: “Á dagskrá fundarins var áætlun um kennslu vegna verkfalls og önnur mál. Skólameistari dreifði tillögum stjórnenda, þar sem gert er ráð fyrir 7 dögum í aukakennslu, þremur í dymbilviku og fjórum á bak páskum. Miðað er við að fyrstu próf verði mánudag 4. maí, hið síðasta 14. maí. Ráð er gert fyrir því að skyldumæting verði aukadagana, en leyfi viett þeim sem hafa löngu ráðstafað þessum dögum. Staðfesting er fengin fyrir því, að allir þessir dagar verði greiddir. Umræður urðu um ýmis atriði. Vilja kennarar vinna á sumardaginn fyrsta? Nemendur vilja ekki sækja skóla á laugardegi. Þeir vilja ekki fleyta önninni fram á sumar.”
Man nokkur eftir þessum hráslagalegu vordögum þegar allir voru að gera það sem þeir vildu ekki? Eða þannig.
Heimanám
og dreifnám
Eiríkur Páll tók saman meðfylgjandi hugmyndir sem hér með er varpað fram til umræðu og mun að lokum skila sér í skólanámskrána á netinu:
Heimanám er
ófrávíkjanlegur hluti af námi í skólanum. Nemendur þurfa að öðlast færni í
ýmsum þáttum námsins, sem ekki næst með því einu að sitja í
kennslustundum. Eðli málsins samkvæmt er
þetta svolítið mismunandi eftir greinum en nemendur þurfa að ætla sér tíma
fyrir heimanám daglega.
Það viðhorf er ríkjandi í skólanum að
sá nemandi sem ekki iðkar nám á eigin spýtur með heimanámi eða í skólanum hefur
ekki fullkomin not þeirrar kennslu sem honum stendur til boða. Kennslu á
nemandi að styðja með heimanámi, þá eru mestar líkur á árangri.
Hvað er
heimanám?
Heimanám felst í því:
· Að búa sig undir kennslustund næsta dags og vera virkur í kennslustundum.
· Að vinna verkefni sem sett er fyrir að vinna heima og skila í kennslustund til yfirferðar. Hér er átt við ritgerðir, heimadæmi, stíla svo eitthvað sé nefnt. Verkefnum verður að skila á réttum tíma ef viðunandi árangur á að nást.
· Að kynna sér verkefni á vef sem bent hefur verið á sem námsefni og geta tekið þátt í umfjöllun í kennslustund.
Öflugt fjarheimanám er nú orðið hluti af fjarnámsáætlun skólans. Dags daglega gengur þessi hluti námsins undir nafninu dreifnám. Skólinn hefur sett sér það markmið að nemendur auki heimanám sitt að hluta í fjarnámi og kennari fylgist með framvindu námsins. Þetta aukna heimanám, dreifnámið, fær vægi í námsmati og námsáföngum verður ekki lokið nema heimanámi/dreifnámi sé sinnt. Með dreifnámi vill skólinn stuðla að sjálfstæði í vinnubrögðum nemenda og auka afköst þeirra í sjálfsnámi og efla tiltrú þeirra á eigin getu.
Dreifnám
í framkvæmd
Skólinn reynir eftir fremsta megni að sjá til þess að nemendur hafi greiðan aðgang að góðu bókasafni með vinnuaðstöðu og að vel búnu tölvuveri, sem nýtist nemendum við heimanám og dreifnám. Námsráðgjafar aðstoða nemendur við gerð áætlana og skipulags í heimanámi.
Hver deild ákveður umfang dreifnáms í áfanga í samræmi við námsmarkmið þess áfanga sem um ræðir. Viðkomandi kennari fylgist með og fylgir eftir dreifnámi nemenda. Í námsáætlun er gerð grein fyrir umfangi dreifnáms í áfanga og hvaða viðurlög liggja við ef dreifnámi er ekki sinnt. Ef deild ákveður fjarnám í áfanga verður skólameistari að samþykkja dreifnám í áfanga í upphafi annar.
Dreifnám verður að skipuleggja sem sjálfstæða námseiningu í áfanga. Ákveðið námsefni sem nemandi les á eigin spýtur verður að vera í dreifnámi og hægt verður að vera að fylgjast með því að dreifnámi sé sinnt jafnt og þétt alla önnina, til þess eru gagnvirk könnunarpróf hentug og það kennsluumhverfi sem Web-ct býður er æskilegt aðhald í slíku námi. Námsefni dreifnáms verður að vera hluti af lokaprófi ef svo er ekki er um heimanám eða einstök afmörkuð verkefni að ræða. Gæta verður þess að námsefnið sé við hæfi þeirra sem stunda nám á eigin spýtur og það sé hluti af námsefni áfangans. Ekki er boðlegt að dreifnámstímum sé eingöngu varið í að leysa prófverkefni til námsmats eða sinna venjulegu heimanámi, til prófa er ætlaður sérstakur tími á skólaárinu og gæta verður þess að ekki sé felld niður kennsla til að nemendur sinni heimanámi. Hafi nemandi ekki unnið í dreifnámi skv. námsáætlun áfangans er eðlilegast að gefa honum fjarvist í þeim tímum sem ætlaðir voru til verkefnisins.
Ljóst er að dreifnám kallar á mikla skipulagningu í námsframboði skólans og gæta verður hófs í því að láta einstökum dreifnámsverkefnum ljúka með einkunn sem hefur vægi í heildareinkunn. Slíkt prófafargan er ekki heillavænlegt og andstætt hugsun áfangakerfisins þar sem önn átti að ljúka með lokaprófi. Fjöldi annarra verkefna er lagður fyrir nemendur og hafa mörg hver vægi í lokaeinkunn. Það er umhugsunarefni að nemendum er gert kleift að flytja próf ef þeir eiga að taka tvö próf sama dag en væri ekki nær að hafa áhyggjur af því að alla önnina er nemendum ætlað að ljúka svo og svo mörgum verkefnum með vægi í lokaeinkunn og það mörgum í sömu vikunni. Það væri hrapalegt ef dreifnámið yrði til þess að auka enn frekar á þann vanda sem kennsluaðferðin PRÓF hefur skapað.
Enn sem komið er bera menn blendnar tilfinningar til dreifnámsins en með bættu skipulagi og aðhaldi mun umfang þess frekar aukast en minnka. Sjálfsmat skólans mun án efa taka á þessum málum og leiða í ljós styrkleika og veikleika þeirra kennsluaðferða sem í boði eru og kanna þarf hug nemenda til þessa námsfyrirkomulags.
Í kjölfar þeirrar kröfu til kennara að kennsla þeirra yrði sífellt sýnilegri er nú svo komið að innan hvers skóla eru starfandi öflugar prentsmiðjur sem dreifa námsefni og hvers kyns verkefnum, kennsluumhverfið Web_ct hefur að geyma margvíslegt efni og virðist aðeins tímaspursmál hvenær það verður opnað almennum nemendum í dagskóla, þar er mikið efni reitt fram á eins ljósan hátt og kennurum er mögulegt. Það er því kominn tími til að kennsluhættir taki verulega mið af þesari breytingu þannig að nemendum verði gert ljóst að vissa námsþætti verði þeir að lesa á eigin spýtur innan tímamarka og uppfylla þekkingarkröfur. Sú þróun sem átt hefur sér stað í skólum gerir mögulegt að breyta strax kennsluháttum, sérstaklega í efstu áföngum þar sem þjálfunar- og færniþættir eru ekki meginmarkmið kennslunnar. Lausnarleitarnám er ef til vill sú aðferð sem stendur næst nýjum kennsluháttum en það sem einkum stendur því fyrir þrifum er að enn sem komið er hefur kennarinn ekki formlega verið leystur undan þeirri ábyrgð að fara yfir allt námsefni áfanga í kennslustund. Um leið og það gerist breytast kennsluhættir og þá opnast möguleikar fyrir aukið lausnarleitarnám eða annað það nám sem greininni hentar best og kennarinn getur einbeitt sér að færri en stærri verkefnum sem ekki hafa námsefnismiðlun að markmiði heldur vinnubrögð og hagnýtingu fræðanna.
Svo mörg voru þau orð.
Sölvi
Sveinsson