Vikuskammtur

16. febrúar 2004

Skráning á UT 2004

Skráning á ut 2004 er hafin. Að venju mun skólinn greiða fyrir þá starfsmenn sem vilja sækja ráðstefnuna sem að þessu sinni verður í Garðabæ.

Skólanefndarfundur

Skólanefnd samþykkti rekstraráætlun fyrir árið á fundi sínum síðastliðinn miðvikudag, og hljóðar hún upp á 427 milljónir og er þá gert ráð fyrir um 15 milljón kr. Rekstrarafgangi. Jafnframt samþykkti skólanefnd svohljóðandi ályktun:

Skólanefnd fagnar þeim bata sem varð á afkomu skólans síðastliðið ár, en þá tókst að reka skólann með afgangi eftir að bættir höfðu verið 850 ársnemendur. Reksturinn er í góðu horfi, nýting í hópum afar góð og aðsókn mikil, bæði í dagskóla og fjarnám.

Í fjárlögum þessa árs er gert ráð fyrir 800 nemendum og í bréfi ráðuneytis kemur fram að allt að 860 nemendur verði bættir. Það er fjölgun frá því sem verið hefur, en skólanefnd ítrekar að æskilegur fjöldi ársnemenda er 950 miðað við núverandi rekstur. Það er eindregin ósk skólanefndar að við þá tölu verði miðað þegar fjárlög næsta árs verða undirbúin.

Skólinn burðast með uppsafnaðan vanda vegna of fárra ársnemenda undanfarin ár, sbr. skýrslu Aðalsteins Eiríkssonar um rekstrarvanda sjö skóla. Skólanefnd mælist til þess að þeir ársnemendur sem skólinn skilaði umfram 850 verði bættir með því móti að grynnt verði á gömlum skuldum og þær síðan afskrifaðar.

Undanfarin ár hefur skólinn skilað að lágmarki 220 ársnemendum sem ekki hafa verið bættir. Á verðlagi þessa árs eru það um 110 milljónir.

Skýrsla um framkvæmd skólasamnings 2003 var send öllum í vikunni sem var.

Því er svo við að bæta að vegna bættrar afkomu voru 15 milljónir millifærðar til skólans upp í gamlar skuldir síðastliðinn föstudag.

Kannanir

Að venju sækjast ýmsir aðilar eftir að kanna viðhorf ungdómsins til eins eða annars. Við reynum að heimila þær kannanir sem eru á vegum ábyrgra aðila og köllum þá eftir niðurstöðum, enda gætu þær komið skólanum og nemendum til góða.

Styrkumsóknir

Minni enn og aftur á að umsóknarfrestur um þróunarsjóð og Sókrates er til mánaðamóta!!!

Skráning í samræmd próf

Skráning í íslenskuprófið hefst í dag og geta nemendur skráð sig næsta mánuðinn.

Bygginganefnd

Eftirtaldir eiga sæti í bygginganefnd auk skólayfirvalda og umsjónarmanns: Bryndís Þóra Þórsdóttir, Kristen Swenson, Erna Jóhannsdóttir, Kristín Björgvinsdóttir og tveir fulltrúar nemenda, þeir Snorri Már Skúlason og Oddur Helgi Guðmundsson. Bygginganefnd er hér með boðuð til fundar næstkomandi miðvikudag kl. 15.00 á skrifstofu undirritaðs. Fella skal niður tíma ef um það er að ræða. Nefndarmenn eru beðnir að lesa vel þá þarfagreiningu sem ráðuneytisstjóra var send og menn fengu til kynningar í vikunni sem leið.