Vikuskammtur

15. nóvember 2004

Kennarafundur

Boðað er til kennarafundar föstudaginn 19. nóvember kl. 13.00. Dagskrá: 1) Kosning fulltrúa kennara í skólanefnd; 2) Niðurstaða umræðuhópa um framtíðarstefnu; Aðstaða nemenda innan húss er slæm. Hvað er til ráða? Kynning skólans út á við. Hvað er hægt að framkvæma nú þegar? Hvernig er best að fylgjast með námsframvindu nemenda?

Að loknum fundi mun áfangastjóri leiðbeina um val og hvaða pytti ber að forðast.

Samstarfsnefndarfundur

Undirritaður sótti fund samstarfsnefndar síðastliðinn fimmtudag og föstudag. Þar var meðal annars rætt um styttingu náms til stúdentsprófs. Ekki er annað að skilja á ráðuneytismönnum en styttingin sé ákveðin de facto þótt umræðan snúist enn um kosti og galla. Þeir skólameistarar sem tóku til máls lýstu allir yfir efasemdum sínum. Ljóst er að námsefni fyrsta áfanga í ísl, ens, dan og stæ verður flutt til grunnskólans. Á fundinum var dreift skýrslu um menntun þeirra sem kenna stæ og nát í grunnskóla og kemur þar fram að 2% þeirra sem kenna stæ í efstu bekkjum grunnskóla hafa BS í stæ.

Innheimta nemendagjalda

Í morgun var 751 nemandi búinn að borga gíróseðla fyrir vorönn. Ætla má að nemendafjöldi á vorönn í dagskóla verði um 850 sem er umtalsvert færra en á haustönn. Svigrúm verður því fyrir meira fjarnám á þeim kjörum sem nemendur njóta nú.

Framvegis

Nú er í burðarliðnum samkomulag milli skólans og Sjúkraliðafélagsins um aukna eignaraðild félagsins að Framvegis, miðstöð um símenntun í Reykjavík. Í ljósi þess og bættrar verkefnastöðu er þess að vænta að hagur fyrirtækisins sé tryggður næstu ár að minnsta kosti.

Ný skólanefnd

Í henni eiga sæti Áslaug Ívarsdóttir frá R-lista, Jón Hákon Halldórsson frá D-lista. Skipaðir af ráðherra án tilnefningar Andrés Andrésson, Kristinn Már Ársælsson, Sigríður Ragna Sigurðardóttir. Áslaug og Sigríður sátu í síðustu skólanefnd.

Sölvi Sveinsson