Vikupistill

14. febrúar 2005

Fjarvistir nemenda

Margir kennarar hafa komið að máli við mig og lýst yfir áhyggjum sínum vegna fjarvista nemenda. Mikilvægt er að nemendum sé gert það ljóst að þeir sem stunda skólann illa fá ekki skólavist í haust (75% reglan).

Átaksvika nemenda 14. – 18. febrúar

Nemendur standa fyrir átaksviku í samvinnu við forvarnafulltrúa og skólayfirvöld vikuna 14. – 18. febrúar. Skólastjórn mun í kjölfarið gera það sem í hennar valdi stendur til að bæta aðstöðu nemenda, t.d. með kaupum á húsgögnum og tækjum. Eftirfarandi reglur gilda:

· 1: Frá og með mánudeginum 14. febrúar skulu allar reykingar á skólalóð FÁ takmarkast við austurenda skólans þar sem reykingarskýlið er. Reykingar annarsstaðar á skólalóðinni eru stranglega bannaðar!

· 2: Öllu rusli, þar með talið notuðu “tyggjói” skal henda í ruslafötur.

Allir eru hvattir til að fara eftir þessum reglum og leiðbeina brotlegum með bros á vör. Vigfús

húsvörður mun meta árangurinn föstudaginn 18. febrúar.

Átaksvikan verður kynnt í hádegishléinu í dag og Lilja og Salka munu syngja lag sitt úr söngkepnni FÁ. Stefnt er að þvi að söngatriði verði fastur liður í átaksvikunni.

Miðannarmat

Miðannarmat þarf að færa í INNU í síðasta lagi 23 febrúar. Nemendur fá matið í umsjónartíma mánudaginn 28. febrúar.

Egluferð

Íslenskudeildin hyggst fara með nemendur á Egluslóðir einhvern daginn í vikunni (þri. til fi.). Reiknað er með að u.þ.b. 60 nemendur fari í ferðina.

Forvarnir

Eitthvað er um það að nemendur noti munntóbak í skólanum. Ekki þarf að taka það fram að munntóbaksnotkun er bönnuð í skólanum.

Útlendingar í heimsókn

Þann 8. feb. kom Charlotta Paschinsky kennari við Svenska Yrkesinstitutet í Vasa í heimsókn. Stine Munk Rasmussen tók á móti henni. Charlotta hafði sérstakan áhuga á lyfjatæknabrautinni og fjarnáminu og fannst henni við langt komin á því sviði. Hún hefur mikinn áhuga á samstarfi skólanna.

Þrír Svíar á vegum menntamálaráðuneytisins komu til að kynna sér fjarnámið í FÁ. Sigurlaug Kristmannsdóttir fjarnámsstjóri tók á móti þeim.

Fundir í vikunni

1.Stýrihópur um sjálfsmat er boðaður til hádegisfundar á skrifstofu skólameistara næsta fimmtudag 17. febrúar kl. 12.40.

2.Kennarafundur er boðaður föstudaginn 18. febrúar kl. 13.00. Á dagskrá er kynning á niðurstöðum þriggja starfshópa: aðstaða nemenda (hópur 5), fjarnámsfyrirkomulag (hópur 10) og hlutir sem hægt er að framkvæma strax (hópur 11).

Gísli Ragnarsson