Að gera forsíðu – gátlisti

Gátlisti er til að gæta að því hvort eitthvað hafi gleymst. Þegar þú hefur gert forsíðuna er rétt að athuga það sem hér kemur á eftir.

• Er titillinn með stærra letri? Það er góður siður að afmarka titil forsíðunnar með stærra letri. Þar þarf þó að gæta hófs og hafa hann í fallegum hlutföllum við annað á síðunni.
• Er mynd á forsíðunni? Í íslensku kennum við ekki hvernig setja á mynd inn á forsíðu. En ef þú hefur mynd skaltu gæta þess að hún sé í samræmi við efni verkefnisins.
• Er nafn skólans rétt skrifað? Of margir skrifa nafn skólans síns rangt og liggur villan í því að athuga ekki nákvæmlega hvernig orðið fjölbrautaskóli er skrifað. Hvort er rétt:
  • Fjölbrautaskólinn við Ármúla
  • Fjölbrautarskólinn við Ármúla
• Hvaða punktar finnast á forsíðunni? Er það í samræmi við dæmin í Handbókinni?
• Ekki er til siðs að hafa punkta á forsíðum nema um sé að ræða dagsetningar eða skammstafanir. Punktar eru ekki á eftir fyrirsögnum, ekki heldur millifyrirsögnum í ritgerðum.
• Þegar dagar eru tölusettir er hafður punktur á eftir þar sem um er að ræða raðtölu: 10 merkir tíu en 10. merkir tíundi. Þegar mánaðarheiti er skammstafað er punktur á eftir skammstöfuninni og mánaðarheitið er skrifað með litlum staf. Þannig er skrifað sept. fyrir september. Skrifið 3. okt. 2002 eða 4. nóvember 2002 þegar þið tímasetjið ritgerðir upp á dag frekar en að tölusetja mánuðinn og ekki sleppa 20 á undan árinu. Dagsetningar eru langflottastar þegar þær eru skrifaðar á þennan hátt.
• Þegar ártal er haft á forsíðu eða í dagsetningu á bréfi er ekki hafður punktur á eftir því eins og sést í dæmunum í Handbók um ritun og frágang.
• Í Handbókinni er sérstakur kafli um skammstafanir, tölustafi og greinarmerki.
• Er nafn kennarans rétt? Það er sjálfsögð kurteisi að svo sé. Kynntu þér hvað kennarinn heitir ef þú veist það ekki nú þegar.